Parlamentario Endy Croes a tuma nota cu tin masha hopi reclamo den e proceso pa un ciudadano por haya un permiso pa habri un Bar y of Bar & Restaurant. Un ciudadano mester aplica pa esaki na DWJZ pa e proceso cuminsa cana. Entre otro mester entrega copia di KVK, papel di Afl.5,- di Censo, papel di bon conducta di OM y yena e aplicacion, paga na Financien pa un publicatie etc. Pa mas di 20 aña tabata tin un maneho cual tabata hustamente pa stimula e proceso conoci bou di e nomber “tolerante”.
Con esaki tabata funciona?
Momento cu departamentonan DVG, Brandweer y Polis bay controla e negoshi na dicho sitio mes tur tres departamento “keur” y bisa cu di nan banda ta ok, e negoshi por cuminsa opera mesora en espera pa e paperwork cana su caminda y DWJZ duna e permiso oficial finalmente. Esaki ta e asina conoci como e “voorlopige vergunning”. Parlamentario Endy Croes ta basta indigna pa no bisa irita con un Directeur di un departamento ta manda un “schrijven” rond pa DVG, Brandweer y Polis na 2018 bou di e gobernacion aki y ta cambia e proceso aki den su totalidad. Awor bo no por habri negoshi mas despues cu e pasa e keuring, esnan cu ta keur no mag di duna ok verbal mas den presencia di e doño y bo mester warda te ora e paperwork keda cla pa bo por habri. Un tardansa enorme den e proceso nobo aki estableci na 2018.
Crea cuponan di trabao
MEP a bay campaña y den su programa ta para cu lo agilisa tur “red tapes” pa por facilita procesonan pa entrepreneurnan por haya nan permisonan mas liher y asina yuda pusha nos economia. E carta aki ta tranca e proceso y hustamente ta contra di locual nos a priminti pueblo. Cada bar of restaurant ta crea entre 4 pa 8 cupo di trabou y asina ta stimula nos economia. Awendia e doño cu ta inverti hopi placa hopi biaha ta pagando huurnan di entre 3000 pa 5000 florin pa luna mientras ta warda averahe 2 pa 3 luna pa permiso promer cu e por habri. Pagando 3 luna na huur por ehempel por costa un ciudadano cu ta inverti rond Afl.15 mil extra pa para ta warda paperwork.
Mester bin cu un sistema structura y practico
Parlamentario Endy Croes ta bay boga pa trece cambio urgente den esaki y dado caso cu mester cambia ley asina sea y lo cambia e ley. Mester bin un sistema structura y practico pa pusha nos economia y yuda esnan cu ta haci inversionnan cuantioso coriendo riesgo pa aporta na nos economia na un manera husto. No ta existi den mi buki cu pasobra un of mas ambtenaar ta malo of no ta na trabou anto e proceso ta tranca. Ningun hende ta indispensabel ni ami tampoco y esaki ta e regla cu mi lo kier mira aplica. Trabou mester continua 5 dia pa siman minimo 8 ora. Mi no ta aprecia trancamento den ningun forma. Mester evalua e proceso aki “met spoed”. E tres departamentonan cu mester eherce e keuring mester por haci esaki den 2 bes 24 ora. Locual mi kier splica ta cu no por ta asina cu e siman aki Polis ta bay keur anto e siman despues un otro departamento ta bay keur y e siman siguiente e di tres ta bay keur. Manera e ordo pa keuring sali den 2 bes 24 ora tur 3 dienst mester por haci nan keuring. Despues ainda mester warda algun siman pa e adviesnan sali etc etc.
Parlamentario Endy Croes ta priminti di lo bay reuni cu e minister encarga Sr Danqui Oduber pa regla esaki lo mas liher posibel den e promer kwartaal di 2020. Nos mester keda agresivo y dinamico pa logra nos metanan y si tin baranca den caminda ta move nan pa trabou por sigui, Parlamentario Endy Croes ta termina bisando.