Parlamentario Endy Croes durante conferencia di prensa dialuna mainta a condena totalmente e vandalismo cu a tuma lugar na Scol di Macuarima. Dialuna mainta a habri cu un noticia masha tristo cu muchanan baldadi a comete vandalismo na Scol di Macuarima. A spuit riba e murayanan den algun klas palabranan menos bunita contra Polis pa despues cende algun lokaal na candela. Henter un hala di 4 lokaal a ricibi daño di cual 2 a kima por completo y e otro dosnan a ricibi bastante daño. Consecuentemente no por a duna les den e otro halanan cual si a keda bon pero sin coriente.
Maestronan abati di dolor
Dialuna mainta Parlamentarionan di Fraccion di MEP Edgard Vrolijk, Endy Croes, Rocco Tjon y Shailiny Tromp Lee a haci un bishita pa por observa esaki personalmente y alabes duna sosten na e maestronan y henter e bario. Maestronan tabata abati di e dolor di mira nan scol y nan lokaalnan cu a kima. Hustamente ta algun siman atras cu nos Promer Minister Evelyn Wever Croes hunto cu Parlamentario Edgard Vrolijk y Minister di Enseñansa Rudy Lampe a lansa e proyecto Innovacion E-learning unda e klasnan aki hustamente a ricibi screennan digital grandi mas un cantidad di computer. Parlamentario Endy Croes a bisa cu di profundidad di su curason ta duel’e pa mira con e klasnan aki cu tur material a wordo destrui. Kico por a pasa den algun hoben nan cabes pa kima e klasnan aki? Investigacion ta andando y nos tin e fe y speransa cu e hobennan aki lo wordo gara pa husticia unda kisas hasta nan mayornan lo mester para responsabel dado caso si trata di muchanan menor di edad.
Daño material y emocional
Segun nos a compronde di Edgard Vrolijk, un di e juffrouwnan tin alrededor di 40 aña dunando les na Macuarima y tabata tin un muraya cu klassefotonan di cada aña cual tur e recuerdonan bunita aki tambe a bay perdi. Pues no ta daño material so esaki a causa pero tambe daño emocional banda di tur e alumnonan cu a wordo perhudica y lo perde les. Parlamentario Endy Croes a termina bisando cu a tuma contacto caba cu gobierno pa atende esaki cu super urgencia pa restablece les pa e muchanan aki riba un termino corto. Parlamento ta para pa duna asistencia legal mediante Ley dado caso cu mester aloca cualkier fondo pa cubri e gastonan encera pa drecha e lokaalnan, materialnan y tur cu tin di haber cu esaki pa e scol por ta ‘up and running’ bek den corto tempo.
Aruba ban nos tur hunto como ciudadano educa nos yiunan cu esaki ta algo cu no por y alabes hunto cuida tur nos scolnan y ki ora bo nota algo no comun pa meld esaki mesora na Polis. Ohala cu algo asina nunca pero nunca mas tuma lugar. Forsa na tur juffrouwnan y meneernan di scol Macuarima y na tur alumnonan.
