Colorado Springs, USA: Un habitante di e estado Mericano Colorado a hunga dialuna merdia un rato pa Santa Claus. David Wayne Oliver di 65 aña a strooi cu placa rond riba caya, e placa aki un rato prome ela horta for di un banco local.
Segun polis e sospechoso a comete un atraco arma riba e Academy Bank y a bandona e banco cu un cantidad di placa cash cu na e momento ey e cantidad no tabata conoci ainda.
E compania local di Television KKTV a informa cu testigonan a mira con e sospechoso Oliver tabata strooi cu placa riba caya, cada rato e tabata saca mas placa for di su saco, e tabata tire’e rond y tabata grita ‘Merry Christmas’.
Algun persona riba caya tabata piki e placanan y tabata hibanan bek banco. Mientrastanto cu e tabata strooi cu placa, Oliver tabata cana riba un rust bay direccion di Starbucks, caminda ela bay sinta y segun un testigo, e tabata warda riba polis pa bin detene.
E corant local Denver Post, a publica cu segun polis ainda tin miles y miles di dollars perdi. Tambe cu No tin niun indicacion cu Oliver a usa un arma di candela durante e atraco.
