Fundacion Contra Cancer di Prostaat (FCCP) a wordo funda na aña 2012 door di algun patient cu na e tempo ey a sinti cu na Aruba no tabatin ningun organisacion pa duna informacion i sostén na hende homber cu a wordo diagnostica cu cancer di prostaat. Door cu e topico aki tabata y ta ainda un taboo na Aruba, e fundación a lansa e campaña na cuminsamento di e luna di September, “Test bo sanger. Sigui disfruta di bida”
E campaña aki a wordo lansa cu varios materialnan promocional incluyendo un short video, na unda nos por presencia hende homber nan den nan bida diario, ta tuma e tempo pa recorda nos comunidad pa test bo sanger y pa asina sigi disfruta di bida. E campaña aki a core for di September te cu November riba differente media nan manera TV, corant, billboard y paginanan social. Den e periodo aki Fundacion Contra Cancer di Prostaat tambe a hasi varios charla na diferente organisacionan i departamentonan di Gobierno manera na Cuerpo di Bombero. FCCP tambe a presenta un symposium huntu cu Whilhelmina Kanker Fonds cu nos docternan local i tambe cu AZV pa papia over e topico di cancer.
Hopi hende no ta consciente cu un test di PSA por wordo haci via bo sanger i e por wordo haci na cualkier laboratorio. Den e periodo di e campaña huntu cu Laboratorio familiar, 229 hende homber a hasi e test aki,cual 182 hende homber nan PSA test a sali normal pero 47 hende homber nan PSA test a sali halto. Esaki ta nifica cu 21% di e personanan cu a hasi e test aki a sali pafor di e balor normal.
Nos miembronan ta consisti di patientnan di cancer di prostaat, of di hendenan cu a pasa den e maleza aki den nan famia, cu ta un hopi doloroso. Pa por garantiza un comunidad sostenible, FCCP kier saca un man na nos comunidad pa encurasha hende homber directamente of via nan sernan keri pa cuminsa test trempan, i no warda te ora ta mucho laat. Naturalmente esaki mester wordo hasi den consulta cu nan doctor di cas pa por sigi tratamento mas avanza.