Un di e tareanan principal di Parlamenta ta di controla maneho di gobierno na nomber di pueblo ya c’un miembro di Parlamento, ta un representante di pueblo y tin cu sirbi interes di cada un ciudadano.
Melvin Tromp di partido AVP ta mustra cu e puntonan aki, puntonan importante y esencial pa asina pueblo wordo sigura cu e ta wordo protehi contra mal maneho di un gobierno, no ta e punto di interes pa miembronan di Parlamento actual cu ta sostene gobierno di Prome Minister EVER Croes.
“Siman pasa por a tuma nota cu algun miembro di fraccion di MEP den Parlamento, a dicidi di bin dilanti y mustra cu keho cu mi persona a entrega na Ministerio Publico, ta un falta di respet pa Prome Minister Evelyn Wever Croes mustrando un mentalidad cu e prome minister por haci y deshaci contra interesnan di pueblo.
Na luga cu nan bay busca mas informacion pa trata di averigua cu loke mi a entrega na Ministerio Publico ta consisti di dje, nan ta Sali manera un set di mucha manda pa bay defende Evelyn na luga cu den nomber di pueblo, bay averigua sin enberdad e practicamente sospechoso cu mi a entrega, ta corecto of no.
Tin suficiente documento, tin carta cu Prome Minister mes a firma, dunando ordo pa un bufete di abogado na cual e tabata forma parti di dje y por hasta bisa cu e ta doño di dje, un di su represententanan a wordo asigna pa representa su persona den reunionnan cu tin di haber cu companianan estatal cu ta resota bou di su persona.
No ta documentonan cu nos a haya riba caya, no ta documentonan falsifica pero documentonan oficial di cual nos a ricibi copia den nos brievenbus cu ta mustra e forma di procede di Premier Evelyn cu ta mustra hopi riba un proceso pa enrikece su mes pa medio di e bufete di abogado aki.
En berdad na momento cu el a bira Prome Minister el a distancia su mes di e bufete aki manera ley ta prescribi pero su interesnan a bay pa un fundacion caminda ora cu e bandona e puesto como mandatario di e pais, e ta haya su parti di ganashi manera tur otro partner di e bufete ta haya.
Loke ta mas tristo den e caso aki, ta cu miembronan di e fraccion di MEP aki no ta carga nan responsabilidad y como parti di nan obligacion nan tambe bay controla e tipo di maniobranan aki y cuestiona loke tin cu wordo cuestiona y den nomber di pueblo busca claridad, nan ta core bay para banda di e Prome Minister, e mesun mandatario cu nan tin cu controla na prome luga.
Pa dos aña largo e miembronan di e fraccion geel ta bin ta atacando lider di nos partido Mike Eman practicamente diariamente pero asina cu menciona e nomber di nan lider Evelyn, di repente esaki no mag y ta exigi respet caminda nan mes no ta duna ningun clase di respet.
Ta un berguensa scucha miembronan di e fraccion aki hunga e rol di protector di un mandatario cu supuestamente nan a hura pa controla den nomber di pueblo, e mesun mandatario cu a pone nan pasa pa payaso, no na un ocasion pero continuamente.
Ta algun luna atras cu miembronan cu ta sostene e gobierno di Prome Minister Evelyn Wever Croes a wordo ridiculisa ora cu nan a entrega y aproba un amienda cu ta cambia e rol di CFT den e ley nobo di LAFT pero e ley aproba aki keto bay ta den poder di Prome Minister ya cu su persona cu a sostene e amienda aki dunando un conseho di voto, despues a dicidi di parkeer e ley aki.
Un ley cu Prome Minister ya a sigura Hulanda for di 2018 ora cu el a firma un acuerdo cu Hulanda pa medio di un protocol cu tambe ta carga firma di Minister di Finansa, Xiomara Ruiz Maduro.
Haci boso trabou, exigi di boso gobierno pa cumpli cu reglanan di bon gobernacion manera boso tur ta propaga, cuestiona cierto decisionnan di partnernan di boso coalicion caminda ta bisto cu amigo y sponsornan di partido, nan interes ta wordo sirbi prome cu interes di pueblo ta wordo sirbi,” sr Melvin Tromp di AVP a declara.