Parlamentario Endy Croes siman pasa a repasa door di un Rapport di Controlaria General alrespecto e proyectonan PPP, esta Green Corridor y Watty Vos Boulevard. Aunke mester bisa cu pa motibo di falta di personal Controlaria General a opta pa investiga solamente maneho di contracto (contractbeheer) y suministro di informacion (informatievoorziening) di e dos proyectonan PPP (Public Private Partnership). Es decir manera a splica anteriormente no a logra investiga entre otro por ehempel si e camindanan ta cuadra cu e balor di e placa cu a wordo inverti, calidad di material, calidad tecnico di e camindanan pa nombra algun. Mike Eman, Benny Sevinger y AVP tabata tin hopi pura pa firma e proyectonan aki cual pueblo lo mester paga bek den 18 à 20 aña y lo costa pueblo casi 700 miyon florin dia cu nos caba di paga nan.
Riesgonan financiero grandi
Segun e rapport – batiendo riba dede di Benny Sevinger y Mike Eman – e riesgo ta demasiado grandi y a sconde informacion di e riesgo financiero pa entre otro Parlamento. Desde inicio di e proyectonan no tabata tin claridad riba e cobertura di e gastonan. Tin masha tiki informacion riba riesgonan financiero di largo plaso di e magnitud aki. Parlamento e tempo aya di AVP no a haya e informacionnan necesario y tampoco informacion di e financiamento pero toch a aproba esaki pa complace Benny y Mike. Asina Baba Herde tabata dirigi su Fraccion y asina e demas stempel parlament di AVP tabata traha. Hopi informacion a wordo “scondi” pa Directie Financien. Controlaria General ta ilustra cu nunca tabata tin un “plan” con ta bay paga e proyectonan aki bek.
80.9 miyon pa 20 aña largo
E Gobierno actual a bin ta solucionando esaki y asina crea espacio pa paga rond di 80.9 miyon florin pa 20 aña largo di cual un porcentahe grandi ta bay pa e dos proyectonan aki. Controlaria General ta conseha Parlamento pa trece cambio y adapta ley di comptabilidad hancra den ley di tal manera cu Parlamento mester wordo informa di obligacionnan cu ta mara pais Aruba pa mas cu un aña “vooraf” y no despues. Exigi cu tur pero tur informacion ta yega Parlamento pa por eherce e control debidamente. Controlaria General ta accentua tambe no solamente promer y durante construccion pero traha rapportnan integral unda ta raporta e progreso pero tambe maneho di gastonan y cobertura financiero y riesgonan. Importante ta e control cu mester sigui despues den e 20 añanan di mantencion cu ta cay tambe bou di e contratista den tipo di contractonan asina di DBFM esta Design, Build, Finance and Maintain.
Lesando e rapport di Controlaria General alrespecto e dos proyectonan PPP aki esta Green Corridor y Watty Vos Boulevard por compronde poco poco e gritonan di Mike Eman “mi ta orguyoso di e debe y e debe t’ey pa nos tur bay pag’e den futuro” pero tambe e grito di e sinberguensa mayor esta Benny Sevinger “I don’t give a damn”! Parlamento # 10 aki lo percura pa sigui e consehonan di Controlaria General y pueblo lo mester percura pa Mike Eman y Benny Sevinger cu nan lange vingers hamas bolbe den poder, parlamentario Endy Croes ta termina bisando.