ARUBA, recentemente Minister di Desaroyo Teritorial, Infrastructura y Medio Ambiente Otmar Oduber a tuma nota di un publicacion unda cu comerciante Hulandes señor Henk van Meekeren a declara cu e lo cuminsa importa santo blanco for di Aruba pa asina crea un hotel nobo cu lo yama BonBini Beachclub. Esaki conforme declaracion hasi di Señor van Meekeren durante un entrevista cu RTV Noord publica dia 23 di november 2019.
Minister Oduber kier enfatisa cu e declaracion di señor Van Meekeren no ta cuadra cu realidad pa motibo cu exportacion di e santo blanco di Aruba sin permiso ta algo cu ta contra ley (AB 1995 GT 24). Gobierno di Aruba a tuma paso importante pa proteha e bida marino na nos Isla y na nigun momento gobierno a otorga un permiso pa exporta santo blanco di Aruba.