Tin ora ta bon pa refresca memoria di nos ex-mandatario cu actualmente no ta ni forma parti di Parlamento di Aruba unda cu sigur su votadornan ta sinti laga na caya paso a vota pa su representashon den parlamento. Pero esey ta keda na cada persona cu nan consenshi y specialmente di e mandatario aki en cuestion.
Nos por recorda campanja 2009 unda cu sigur e lema tawata cu BBO lo wordo elemina. Na momento cu e gobierno e tempo ey a tuma over, a rebaha e BBO di 3% pa 1.5% y pa despues di algun tempo introduci un BAZV na 2%, significando cu mester e paga e BBO & BAZV hunto na 3.5%.
Alavez a hisa loke ta e premie di AZV y AOV na loke nos conoce te dia di awe, esta AZV 10.5% cual ta 8.9% werkgever y 1.6% werknemer y loke ta trata AOV-AWW esaki a bira 15.5% cual 10.5% werkgever y 5% werknemer.
Asina a conoce diferente subida riba diferente leges y servicionan di gobierno.
Un cos cu semper tawata remarcabel ta, cu na momento cu mester a atende cu presupuesto di Land Aruba semper e gobierno tawata inclui entradanan cu e tawata verwacht di hanja di e.o. Valero e tempo ey y otro postnan cu tambe tawata conta cu nan. Hinkando esaki den bo presupuesto, riba papel semper lo mustra cu bo tin un entreda hopi halto, pero de facto na final di dia bo tin un deficiet enorme riba bo presupuesto. Esaki nos por a wak claramento den e coresponcia entra Aruba y Hulanda na 2014 cu a termina den un welga di Hamber cu nos conoce como Welga Ensure. Consecuentemente Aruba a hanja su mes ta accepta un CFT unda cu nos a wordo poni bou di Financiele Toezicht.
Na momento cu un persona kier renoba p.e. su hypotheek e ta bai banco pa asina refinancia su hypotheek. Banco lo por reduci e procentage di interes, pero e suma fia si ta subi. Esaki ta signifa cu na final di dia bo gasto a subi. Esey ta loke a pasa cu Aruba cu e diferente PPP projecten.
Como cuidadano bo ta pensa cu bo lo por hanja entrada additional di otro fuentenan di entrada los di bo trabou, den forma p.e. side job pa cumpli cu banco. E side job no ta algo sigur y bo no por conta cune tur luna. Na momento cu bo no por cumpli cu bo pago di hypotheek, of bo ta bai bou curatela of banco ta tuma posishon di bo propiedad y bende esaki riba findishi.
Wel esey tawata e refineria durante e gabinete anterior. A hasi varios projectonan grandi contando cu lo por cubri e gasto cu algo cu no tawata duna siguranza, y den e caso aki e refeneria hasta tawata sera. Awo nos ta varios anja despues y gobierno a cambia.
Kiko nos ta wak awendia, un gobierno cu na su turno ta hasi su maximo esfuerso pa atende cu e retonan aki na un manera sostenibel y realistico. A bin cu reforma fiscal unda cu na comienso di anja ja caba hopi donjo di cas cu un balor abou no lo ta pagando grondbelasting. Y otronan cu e suma di grondbelasting a conoce un rebaho den e reforma fiscal. A elemina e diferencia entre tarief I y II den bo loonbelasting hasiendo esaki 1 solo. Cual a signifa pa mas cu 50% di e poblashon laboral di Aruba un rebaho den nan loonbelasting tur luna.
Asina mes cu tur e retonan financiero cu Aruba ta confrontando su mes, Gobierno di Aruba a sa di respeta e protocolnan firma den pasado, cumpliendo debidamente cu su habitantenan.
Pesey mi no por compronde con e autor principal di tur esaki kier critica o hasi cu e no tin nada di haber cu loke ta pasando. Como un persona integro cu respet propio y dignidad ta keda nada otro na duna honor na bo mes y retira di politica. Laga otro tuma rienda y sigui lucha pa hiba nos dushi Aruba dilanti.