Parlamentario Shailiny Tromp-Lee a asisti na Apertura di e Siman di Lantamento di mucha cu a tuma lugar diabierna dia 15 di november 2019. Un bunita atardi dedica na nos muchanan. Un actividad yena di canto, baile, poema, pintura y wega pa nos muchanan.
E aña aki ta pa di dos aña cu Gobierno di Aruba conhuntamente cu stakeholders ta pone atencion riba lantamento di mucha. Esaki pa medio di e Siman di lantamento di mucha.
Un siman cu diferente actividad pa henter Famia. Meta ta entre otro pa conscientisa y aporta na mehoracion di e bida di nos muchanan.
Gobierno a scoge e siman aki mirando cu dia 20 di november ta Dia Internacional di derecho di mucha. E aña aki ta conmemora 30 aña cu paisnan rond di mundo a firma e Tratado cu e meta pa proteha tur mucha na mundo. Aruba ta uni su mes na e causa aki y ta enfatisa riba e importancia di lanta nos muchanan den un ambiente di amor y siguridad.
Mediante Sociaal Crisisplan Gabinete Wever-Croes ta yuda cu fondo pa haci tur actividad posibel. Ta importante pa nos muchanan y nan famia ta na altura di derechonan di mucha y e 6 puntonan basico pa cada mayor por lanta nan yiu den un hogar cu amor, cariño y respet. E siguridad y bienestar di nos mucha- y hobennan ta responsibilidad di nos tur.
Parlamentario Tromp-Lee ta aplaudi y sostene e siman aki caminda ta purba mas cu por pa asisti na e diferente actividadnan cu tin ariba schedule. Banda di e apertura ya caba Tromp-Lee a asisti na e Debate Pro/Contra organisa pa Telefon pa Hubentud pa nos hobennan relaciona cu Dia Internacional di Mucha y 20 aña di existencia di Telefon pa Hubentud. Alabes a asisti na e seminario cu a tuma lugar na Universidad di Aruba relaciona cu e siman aki, caminda a presencia e presentacion di mr. D. Angela (Rechter Gerecht in eerste aanleg).
Di awor caba Tromp-Lee kier yama pabien y desea exito cu demas actividadnan na Minister Glenbert F Croes, Ministerio di Asuntonan Social y demas organisacionnan cu ta haci e siman aki posibel.