Parlamentario Endy Croes a reacciona riba sindicalista Maduro di Douane kende algun dia pasa tabata den e Noticiero Dinamico mainta di Hans Geerman. Siguiendo e entrevista di e meneer Maduro representante di Douane por a tuma nota di algun declaracion.
Parlamentario Croes lesando e documentonan toch kier a aclarea. Segun Maduro cu gobierno a faya momento a negocia e protocol di 22 di november 2018 como cu eyden mester a cera un acuerdo di 500 miyon enbes di 479 miyon di gastonan di personal y asina por tabata tin indexering y tur otro gastonan di personal cubri. Depende den cual boto bo ta nabega bo lo compronde e materia. Pa 1.4 miyon di Social Crisis Plan cu a bay riba e 479 miyon Minister President ta actualmente na Hulanda e siman aki pa purba scapa un KB riba e tema aki. Sindicatonan ta pidiendo 28.8 miyon extra. Djis pa pueblo compronde unda nos ta para. Parlamentario Endy Croes ta puntra si e tipo Maduro aki ta lesa tur documento of ta lesa mitar di documento of esnan cu ta cumbini’e solamente.
SADA a firma pa subi edad di pensioen
Segun Maduro cu gobierno (actual) a acepta cu empleadonan publico a bay atras despues cu a introduci pensioen na edad di 65 aña y a bay over di PVL (Pensioenverordering Landsdienaren) pa NPR desde 1 di januari 2011 bou gobernacion di Mike Eman. Croes ta bisa cu esaki ta e berdad real. Pues no lo cuestiona Maduro riba esaki pasobra esaki ta un hecho. Mas tristo ta cu sindicatonan mes a firma esaki a cambio pa haya poco plaka di indexering den forma di Bashi Premie, Gelijk Bedrag y Reparatie Premie. SADA tambe a firma y a bay di acuerdo. Awe bo kier splica cu gobierno a acepta? Ta den cual mundo bo ta biba mucha homber? Kisas bo no tabata esun cu a firma e tempo aya pero lo ta na su lugar pa bo lesa poco di e historia promer bo bin papia disparate. Mescos gobierno ta un continuacion manera bo mes ta bisa, den sindicato esaki no ta diferente. SADA a firma pa subi edad di pensioen y SADA a firma pa e cambio di PVL pa NPR. Esaki consecuentemente ta un bofta den cara di boso propio sindicatonan dia a firma esaki y awe kier splica den prensa cu gobierno (actual) – kende no tabata na poder e tempo aya cu SADA a firma – ta reconoce cu boso a bay atras cu e cambio aki? Unda bo voz a keda pa para e cos aki?
Unda SADA a keda pa formacion di comision?
Bilateraal Akkoord entre Mike Eman, Mike de Meza y sindicationan entre otro SADA kende tambe a firma cual a wordo firma 27 di augustus 2010 y reenforsa 8 di december 2011. Tambe mi a scucha Maduro reclama cu atrikel 5 den e protocol di 28 di mei 2014 cual SADA tambe a firma tin para cu na 2019 lo paga indexering di 2018. Locual Maduro no ta splica cu den e mesun artikel 5 di e mesun protocol cu e ta referi na dje ta para cu lo forma un comision di 3 representante di gobierno mas 3 representente di sindicatonan kendenan den luna di juli 2014 lo bin cu un “voorstel” alrespecto e indexeringmechanisme cu lo wordo usa pa por cuminsa paga desde januari 2019 riba aña 2018 enadelante. A resulta cu ningun pero ningun comision a wordo forma desde e tempo ey. Unda SADA a keda pa cu formacion di e comision aki cual mester a wordo forma desde 2014? Roncando? Esaki ta para den e mesun protocol y na mesun artikel 5 cu e cabayero Maduro a referi na dje durante su entrevista na radio.
Parlamentario Endy Croes ta compronde e lucha di sindicato pero semper y cuando nan ta sincero y ta papia berdad y no solamente parti di e berdad. Pone boso schoudernan bou di pais Aruba y hunto busca solucion y no destrui un pais momento cu e pais mester boso contribucion.