Parlamentario Endy Croes ta felicita Gabinete Wever Croes y muy en particular Ministernan Otmar Oduber y Danqui Oduber cu e logro grandi aki pa San Nicolas. Desde 2012 cu refineria a cera su portanan y a bay, tabata notabel cu actividadnan comercial den San Nicolas a cay masha hopi y poco poco negoshinan a cera nan porta y a bandona San Nicolas.
Gabinete Wever Croes cu un vision solido cu e miras pa ningun hende wordo laga atras a implementa su vision y liña di trabou. “Menos palabra pero demostra cu hechonan”. Den esaki Minister di Infrastructura Otmar Oduber den combinacion cu Minister di Turismo Danqui Oduber a hunga un rol grandi cu e compromiso pa trece bida bek na San Nicolas.
A percura pa firma un proyecto pa construi e promer Hotel den historia pa San Nicolas. Ta trata di un Hotel inicialmente 600 camber cual lo wordo amplia cu 300 camber mas den e siguiente fase. E Hotel lo carga e nomber Secrets Baby Beach Resort. Siman pasa durante e groundbreaking e inversionistanan kendenan tabata presente tabata hopi contento pa cu e poyecto aki.
Desde ariba unda e hotel lo wordo construi esaki tin un bista masha masha bunita pa cu e area di Baby Beach. Sigur no tabata facil pero e meta final a wordo conclui y e promer hotel den historia di Aruba pa San Nicolas cual lo bay percura pa stimula y desaroya economia pariba di brug awe ta un realidad.
Pabien na nos promer Minister Evelyn Wever Croes cu a duna su aporte y ta kere den e proyecto aki, Pabien na Ministernan Otmar Oduber y Danqui Oduber pa boso empuhe y henter coalicion pa sostene e vision pa San Nicolas haya algo tangibel den un inversion miyonario cu lo contribui na su desaroyo. Pabien Aruba, Pabien San Nicolas, Pabien Gabinete Wever Croes. Working towards a “Bright Future”.