Home Entertainment SLAND TAKEOVER ARUBA TABATA UN BERDADERO TAKEOVER

SLAND TAKEOVER ARUBA TABATA UN BERDADERO TAKEOVER

SHARE

 

 

Recientemente Aruba como tambe un gran cantidad di turista a disfruta di e di dos edicion di Aruba Island Take Over Festival. Por a tuma nota cu en berdad e tabata un ‘Take Over’ completo mirando cu durante 5 dia tur evento rond di nos isla tabata bon atendi. Naturalmente e anochi di concierto cu UB40 ft Ali & Astro, Sech, Lunay, Alex Sensation y Jeon tabata monumental cu miles di bishitante den Harbor Arena. For di exterior a yama bon bini bishitantenan for di Curacao, Boneiro, Merca, Panama, Colombia, Venezuela, Hulanda y otro paisnan. 

 

E ‘Take Over’ a cuminsa riba Diaranson, 31 di October cu e ‘ATECH Conference’ unda cu varios participante a sigi e diferente sesionnan cu oradornan y panelistanan local y internacional. A sigi pa e anochi di apertura na Craft unda DJnan local a deleita e publico cu bon musica y craft cocktails den un ambiente hopi ameno. Riba Diahuebs y Diabierna AITO a forma parti di e Aruba Innovation Week unda a presenta diferente sesionnan informativo. Diabierna mainta y Diasabra a pone enfasis riba nos cultura y historia cu e ‘walking tours’ den centro di Oranjestad y muralnan na San Nicolas.

Diabierna anochi tabata e anochi di e evento principal. For di oranan trempan di atardi multitud di hende di tur generacion a yega na Harbor Arena pa asina por tin un bon lugar pa disfruta di nan artistanan preferi. Elite Productions & Entertainment a sa di prepara un Harbor Arena cu e mihor den sonido, luz y efectonan special cu a transforma e localidad den un centro di entretenimento unico den nos region. For di e prome presentacion di Jeon cu a sigi cu Alex Sensation, Lunay, Sech y por ultimo UB40 ft Ali Campbell y Astro, e publico a sa di canta y baila cada un di nan exitonan.

Diasabra e famoso y tan espera ‘EF x Partai Pool Party’ na Aruba Renaissance Hotel a conta cu un publico grandi cu entretenimiento di varios DJ internacional. Parti anochi por a conta cu dos evento completamente sold out, e prome den lobby di Aruba Marriot Resort unda cu Chef Ever de Peña (Venezuela), Romeo Penacino (Argentina), Teddy Bouroncle (Peru), y Urvin Croes (Aruba) a sa di prepara varios plato sensacional den e Chef’s Pop Up. Pa complementa e anochi aki, publico di Aruba y bishitantenan a disfruta di e ‘Block Party’ cu a tuma lugar rond di The Village Mall. Aki diferente DJ local y internacional a sa di mezcla tononan musical den e diferente clubnan den e area.

Finalmente Diadomingo den Parke Arikok a tuma lugar un desayuno exclusivo cu e tema ‘Conquistador Alonso de Ojeda’. Y pa clausura e Aruba Island Take Over, Pelican Pier a wordo sacudi cu sonidonan di techno cu entretenimento di varios DJ local y internacional te cu oranan di anochi.

Elite Empire Entertainment como organisador ta mira atras riba un di dos edicion sumamente exitoso y ta gradici tur stakeholder y partner cu a contribui na un of otro manera pa hasi esaki posibel. Ta pidi pueblo di Aruba y e publico general pa keda pendiente pa Aruba Island Take Over 2020 aun mas grandi. 


Aruba Island Take Over ta un presentacion di Aruba Tourism Authority, Aruba Trading Company y SETAR N.V. como patronisadornan y un danki na nos partners Aruba Marriot Resort, The Ritz-Carlton, Aruba, Holiday Inn Resort, The Mill Resort, Hyatt Regency Hotel Aruba, Aruba Renaissance Hotel, Divi Resorts,  Barcelo Aruba, Eagle Resort, Atech Conference, Fun Miles, EF, Elite Productions y Amigo Car Rental.