Anchelino Vrolijk di POR: San Nicolaas, e cuidad cu lo ta bek riba mapa economicamente.

Durante diferente decada nos por a wak con poco poco San Nicolaas tawata bayendo atras economicamente mientras cu nos por a wak e area di Oranjestad y Palm Beach crece economicamente.
Ainda hopi di nos por corda con famianan tawata bai Coruba (actual BSL) pa hasi compras, o bai Janchi Jewelers den caya principal di San Nicolaas pa cumpra joyas o laga drecha joyas, o e barberonan cu tawata situa den e caya di Las Vegas Bar bai abou. Nos por corda Kong Ming Supermarket (actual Macro) con riba diasabra e lugar tawata jena completamente cu cliente. Actualmente e lugarnan aki no ta existi mas. Alavez nos por a wak con scolnan a sera den e area di San Nicolaas paso no tin suficiente alumno mientras cu otro scolnan a fuseer hunto pa asina por tin ainda suficiente alumno.
E epoca aki di decadencia ta jegando su final. Cu e binimento di Secrets Baby Beach nos lo por wak un San Nicolaas cu lo sa di florece bek y asina forma un parti crucial den Aruba su economia.
Loke ta trata e refineria, desde anjanan ’50 hopi proceso a wordo automatisa y mester menos forsa laboral pa traha. Cu e reapertura di e refeneria na anja ’89 e no a duna San Nicolaas e boost economico cu tawata mester di dje. Y asina nos por wak cu poco poco, hopi habitante vooral jong a cuminsa bandona San Nicolaas pa asina establece nan mes den area di Noord/ Paradera. Esaki ta visible tambe den e cayanan di San Nicolaas.
Secrets Baby Beach cu su 600 camber lo ta bon pa minimo 1800 cupo di trabou. Awo cu e ta drenta den su fase di construction, esaki lo atrae trahadornan pa e area. E trahadornan aki mester por come y bebe. Esaki sigur lo atrae tambe lugarnan di cuminda y lugarnan cu lo bende refreshment. Actualmente den e area di Colony nos no conoce un supermarket. E unico cu ta estableci den e area aki ta Lago Heights Food Center.
Actualmente Citgo ta sera y honestamente bisa, loke ta refeneria a conoce su epoca cu a pasa. Secrets Baby Beach lo sa di bai genera entrada pa gobierno cu lo por compensa e perdida di un refeneria.
Famianan cu a lanta na San Nicolaas o yuinan cu a bai establece otro parti di Aruba lo sa di bin bek San Nicolaas pa traha. Secrets Baby Beach lo sa di atrae diferente tipo di negoshi o actividad recreativo. Y esaki nos ta wak tambe den e projecto di embeyecimento di Baby Beach area. Finalisando mi mester bisa e pueblo di San Nicolaas PABIEN, paso loke e projecto aki lo trece cune ta uno di un magnitud enorme pa un area cu pa decadanan a conoce unicamente decadencia. Awo San Nicolaas lo conoce un epoca nobo y un desaroyo economico cu nos por ta orguyoso riba dje.