Avenida Alo Tromp, Oranjestad: Diasabra anochi den careda di mey anochi presencia di polis a wordo pidi na e Clubhouse di Cas di Partido pa un persona cu tabata bou influencia y a comete destruccion den e baño di e Clubhouse.
Na yegada nan a bin compronde cu un homber bou influencia, kende no ta miembro di e Clubhouse a yega eynan, e homber tabata mustra basta bou influencia cu e no por a ni cana drechi. Ela comenta cu ela sali di un otro bar y kier a usa e baño di e Clubhouse.
Despues di un rato a scucha un desordo den e baño, esnan presente no a confia esaki y mesora a bay mira kico tabata pasando eyden, pa nan sorpresa, e persona aki a manda un mokete riba e spiel den e baño y a destrui esaki completamente, aparentemente e tabata tin intencion di sigui haci mas daño den e establecimiento, pero esnan presente a actua lihe, nan a saca e persona aki porta afo y a pidi pa presencia di polis pa bin atende cu ne.
Polis a detene e homber y a pidi pa un transportwagen pa hibe warda di polis. Nos a compronde cu un denuncia lo a keda entrega.
