E siman aki, pa ta specifico, 14 di november inicio di un etapa nobo pa San Nicolas lo inicia. Miembronan di Fraccion di POR, Marisol Lopez-Tromp y Alan Howell, ta sumamente entusiasma y positivo pa loke ta groundbreaking di Secrets Baby Beach Resort.
Nan ta indica cu despues di casi 4 decada finalmente e lucha di diferente gobierno y ministernan lo bira un realidad. Durante casi 40 aña hopi a purba y a traha duro pa logra yega na un hotel pa San Nicolas y dia 14 di november awo un desaroyo nobo pa San Nicolas ta iniciando, miembronan di Fraccion di POR a expresa.
Desde ciere di lago den decada di añanan 80 por a mira con e desaroyo di San Nicolas a stagna y e parti pariba di nos isla a bay atras y a keda hopi atras compara cu e resto di Aruba.
Awo cu e construccion di un hotel manera Secrets Baby Beach Resort porfin lo mira un cambio real na e parti aki di nos isla, un cambio pa bon, un cambio positivo tan anhela pa decadanan caba.
E imapcto di e construccion di e hotel lo ta uno positivo cu lo por wordo sinti y mira for di inicio di construccion y cu lo continua despues cu operacion di e hotel.
Lo bay mira cu lo tin mas oferta di trabou den diferente sector, lo mira un desaroyo economico, infrastructural y financiero cu lo beneficia no solamente San Nicolas y vecindario, pero henter nos isla.
Ya caba por mira e interes grandi cu San Nicolas tin entre diferente inversionista y esaki lo crea mas espacio ainda pa loke ta e meta pa haci di San Nicolas e Cultural and Heritage City di Aruba, representando asina un aspecto unico y diferente di lo cual ta e resto di nos isla.
Cu e desaroyo di e hotel lo por mira un mayor volumen di hende den e area y lo enforsa e desaroyo historico y cultural cu ta trahando riba dje.
Ademas ta diferente comerciante tanto grandi como chikito lo beneficia di e desaroyo nobo aki, simplemente pa duna algun ehempel por menciona restaurantnan, taxistanan, tour operators, watersports, tiendanan y café’s, miembronan di Fraccion di POR a indica.
Ta premira cu e tempo di constuccion lo ta di 18 luna, lo cual kiermen cu por spera e inauguracion di e hotel pa aña 2021 cual ta conta cu un inversion di 200 miyon pa loke ta e dos fasenan, e prome di 600 camber y e di dos di 300 camber.
Marisol Lopez-Tromp y Alan Howell ta felicita San Nicolas y Aruba en general, Connected Capital, Grupo Martinon, Three Rivers Real Estate. y Gobierno di Aruba, specialmente Minister Otmar Oduber kende a persevera riba e vision di trece un desaroyo nobo pa San Nicolas. Pabien!