Palm Beach: Diabierna algo prome cu 11’or di anochi, chauffeur di un Nissan March a nota cu chauffeur di un Toyota Yaris Shinishi tabata treciendo e trafico den peliger, e tabata coriendo hopi malo y den e auto e tabata tin dos mucha chikito. Mesora e chauffeur di e Nissan March a bati alarma.
Net pariba di Palm Beach Plaza polis a logra para e Toyota Yaris aki y mesora a bay atende cu e chauffeur. E chauffeur tabata mustra enberdad bou influencia, despues a sali na cla cu e mesun chauffeur aki, un rato prome lo a dal un auto den e parkeerplaats di Marriott y kier a bringa cu un security guard di e hotel. Ela sigui core bay direccion Palm Beach Plaza caminda polis a logra par’e. Polis mesora a atende cune y a mustre riba e peliger cu e ta causando na bida di no solamente e dos criaturanan cu e tabata tin den auto, pero na su mes y tur den trafico, door di stuur auto bou influencia.
Polis a deten’e y a pidi mesora pa transportwagen pa transport’e pa Warda di Shaba, mientras e dos criaturanan tur spanta y tristo a keda warda riba un miembro di famia pa bin buscanan.