Oranjestad- Dia 16 di november Rotaract Club of Aruba lo ta organizando e di 6 edicion di e feria tan gusta “Pasa Pret cu Rotaract” na Club Caiquetio. Un evento completamente gratis cu diferente actividadnan pa mucha y mayornan pasa un atardi debertido.
E feria di Pasa Pret cu Rotaract ta wordo organisa desde 2014 den conexion cu e dia International di proclamacion di e Derechonan di Mucha. Celebra mundialmente dia 20 di november, e derechonan di mucha ta stipula cu tur mucha tin derecho riba bida, salud, educacion, pa hunga, riba bida familiar, di ser proteha for di violencia, no wordo discrimina, y pa nan opinion wordo scucha. Ta pa e motibo aki Rotaract Club of Aruba a wordo inspira pa organisa un feria unda tur mucha di Aruba por bin eherce nan derecho di hunga hunto cu nan famia, amiguito y amiguitanan.
E aña aki e feria lo ta un bes mas na Club Caiquetio cuminsando for di 12or di merdia te cu 5or di atardi. Lo bai tin diferente wega manera: Careda di Bulamento den Saco, Careda di Douw, Baseball pitching, Bowling, Huki di Arte, Face painting, Photobooth, Careda cu Cuchara y mucho mas. Alabes, cada mucha ta haya e oportunidad pa busca un regalito den grabbelton despues cu nan caba di hunga tur e weganan. Banda di tur e weganan lo bai tin Bouncy House, grupo di baile, y musica di DJs.
E biaha aki ta pidi tur mucha pa bin cu nan kleurplaat di Pasa Pret cu Rotaract pa asina nan por ricibi un ticket na e Huki di Arte dia di e evento pa drenta e rifa pa por gana un bunita premio durante e transcurso di e evento. Por download esaki for di e potret of por manda Rotaract Club of Aruba un mensahe riba nan pagina di Facebook.
Rotaract Club of Aruba kier gradici sponsornan cu sigur ta haci e posibel pa tin un evento di calidad pero gratis: De Wit & Van Dorp Stores, Forensys y FMSA. Alabes mester gradici Mi Mami Group y The Simpler The Better Party Decorations pa nan colaboracion durante e evento aki.
Nos ta invita tur mami cu papi, oma cu opa, tanchi cu tio pa bin pasa un dia dushi cu e chikitonan. No lubida di print y trece e pintura di Pasa Pret cu Rotaract na e evento. Pa mas informacion, Like y Follow e pagina di Facebook y Instagram di Rotaract Club of Aruba of klik cu bo ta interesa riba e pagina di e evento “Pasa Pret cu Rotaract” riba Facebook.