Parlamentario Endy Croes ta boga pa un estudio profundo riba indexering. Lo ta prudente pa mira den Reino Hulandes, sector priva y den region con ta atende cu e tema aki pa asina por yega na un acuerdo unda tur hende por biba cune y un gobierno por tin e trankilidad pa resolve demas problemanan grandi cu Aruba ta pasando aden. Alabes Parlamentario Endy Croes ta di opinion cu no por ta asina cu momento un pais ta sangrando financieramente sindicatonan kier hunga wega of usa triki pa bringa pa nan causa. Cu tur respet pa tur lucha, un hende normal mester por ta stima su pais y mester por compronde situacion di su pais y mester por brinda solidaridad na e momento cu mas bo pais ta pidi esaki di bo. Si nos mira atras, desde cu sindicatonan a welga en bloke den aña 2007-2008 a logra firma un protocol e tempo aya 25 di april 2008 como lo siguiente.
1.2% inhaalmanouvre na 2008
Gobierno di MEP e tempo aya a reconoce un porcentahe di 1.2% como inhaalmanouvre cual tabata habri ainda y yega na acuerdo pa paga esaki desde 1 di januari 2009 den forma di un aumento di e “Bashi premie”, esta Voorjaarspremie (paga na januari) cual a subi di Afl. 500,- pa Afl. 884,-. Alabes a bay di acuerdo pa un compensacion di Afl.105,- retroactivo desde 1 di januari 2008 pa cu parcialmente e perdida di poder di compra pa cu aña 2007. Esaki a conta pa e pensionadonan tambe e tempo aya di acuerdo cu e protocol. A calcula e restante di perdida den poder di compra (indexering) pa cu e periodo 2002-2007 na 8% di cual tur partner a bay di acuerdo.
Acuerdonan bilateral di 2010, 2011, 2012
Den un Bilateraal Akkoord di 26 di augustus 2010 a bolbe duna un aumento den salario di Afl.105 florin y ademas a aumenta Bashi Premie di Afl. 884 pa Afl 1000,- y a aumenta e Gelijk bedrag (cual ta wordo paga na november) di Afl. 1250,- pa Afl.1350,- pa asina gana tempo pa negocia cu sindicato cual lo bay na vigor desde 1 di januari 2011.
Den un proximo Bilateraal Akkoord firma 8 di december 2011 a yega na acuerdo cu pa perdida di compra den su totalidad di diferencia di september 2007 pa 31 di augustus 2011 lo aumenta desde 1 di januari 2012 e bezoldiging cu Afl.140,- y lo aumenta e Bashi premie di Afl. 1000 pa Afl. 1350,-.
Den un proximo Bilateraal Akkoord data 21 di december 2012 a bolbe aumenta bezoldiging di ambtenaar cu Afl. 85,- pa cubri e periodo di 1 di september 2011 pa 31 di augustus 2012. Pendiente a keda e parti firma den protocol di April 2008 esta e periodo di 2002-2007 cual a wordo ancra na 8%. Aki Parlamentario Croes ta sinti cu Mike Eman a hunga su caha di triki contra sindicato.
Nieuwe Pensioen Regeling NPR
Pa negocia e 8% indexering cu tabata habri di aña 2002 pa 2007 a forsa sindicatonan reconoce y hunto Gobierno (AVP) y Sindicatonan a “stel vast” cu pensioen PVL ta impagabel y mester bay over pa un nieuwe regeling NPR. Tur pensionado den PVL lo mantene nan derecho di pensioen y duurtetoeslag te cu 31 di december 2010. Tur esaki a cambio pa negocia indexering atrasa di 2002-2007. Den cambio di pensioen di PVL pa NPR empleadonan publico a bay masha hopi atras. Kisas nan no a compronde ainda kico nan propio sindicatonan a negocia pa nan. Futuro lo laga boso sintie y compronde.
Sindicatonan mester tin comprension
Den e negosacion pa paga indexering atrasa a yega na acuerdo pa paga e indexering di 2002-2007 (cual a bira 7.6% en bes di 8%) den 10 aña cuminsando desde 2014 pa 2024. Poco poco lo aumenta e Bashi Premie, Gelijkbedrag y Reparatie Premie pa cumpli cu esaki. Adhunto un tabel pa pueblo por mira cu banda di salario, banda di vakantieuitkering empleadonan publico ta cobra entre Afl. 5000 pa Afl. 6000 pa aña reparti den 3 pago. Awe Aruba ta den un debe gigantesco. Gobierno ta keda cumpli cu afspraaknan haci. Pero ta logico si cu mester tin comprension di sindicatonan y moralmente mester por tin e sentimento di amor y solidarismo pa cu nos pida baranca tan stima Aruba, Parlamentario Endy Croes ta termina bisando.