Riba diahuebs 31 di October, Post Aruba NV a ricibi un flota di auto nobo. E entrega di e autonan nobo aki a keda efectua den presencia di Minister di Transporte, Comunicacion y Sector Primario, sr. Chris Romero, Director di Post Aruba NV, sr. Guillermo Raymond, como tambe staff y personal di Post Aruba NV.
Yrausquin & Sons un biaha mas ta e compania encarga cu e lease di e flota nobo aki. Sra. Christina Yrausquin, Gerente di Benta di Yrausquin & Sons, a haci entrega oficial di e yabinan di 7 Ford Figo Hatchback y 1 Ford Ecosport, na e director di Post Aruba NV.
E vehiculonan Ford Figo lo wordo uza principalmente pa Servicionan Corporativo, E-Post y Express Mail Service. Mientrastanto cu e Ford Ecosport lo wordo uza pa, entre otro, haci control di e partimento di corespondencia riba caya, atende e carteronan ora tin algun incoveniencia of, si mester, hiba extra post pa e partidornan di carta.
Directiva y empleadonan di Post Aruba NV ta satisfecho cu e renobacion di nan flota di auto despues di 4 aña. E vehiculonan di Post Aruba NV ta core constantemente riba caya y como tal e ta hopi importante pa nan ta den bon condicion, como cu vehiculo ta un instrumento escencial pa e compania brinda un servicio di entrega optimal.
Post Aruba NV actualmente ta den un periodo di modernisacion, cual ta ensera mehoracion den su procesonan logistico y adaptacion di servicionan existente. Tur esaki cu e proposito di brinda companianan local y nos comunidad, servicionan di calidad halto y adapta na e cambionan y necesidadnan actual di tur cliente.
Pa informacion tocante e servicionan di Post Aruba NV, bishita nan website postaruba.com of like nan pagina di Facebook: Post Aruba NV.