E prome y di dos aña di estudio pa maestro di enseñansa primario na IPA ta e añanan cu bo ta orienta riba bo futuro profesion como maestro. Durante e periodo aki bo ta cera conoci cu tur area di formacion y tambe e dos specialisacionnan cu IPA ta ofrece. Na final di e prome aña bo por scoge pa e specialisacion mucha di 4 pa 8 aña of di 6 pa 12 aña. Tyfanny Garcia, studiante di di aña tres, ta conta su motivacion pa scoge pa e specialisacion 6 pa 12 aña.
“Mi a scoge pa traha cu muchanan di scol basico a base di locual mi a experiencia y a sinti durante mi stage. Tur mi stagenan tabata exitoso di cual ma siña hopi na scol preparatorio y scol basico. Tambe ma wordo inspira door di mi mentornan kendenan tabata yuda mi pa saca lo miho di mi y haci mi lesnan bon na nivel. Na final di aña 2 unda mi mester a tuma e decision di scoge specialisacion, mi a dicidi di sigui cu locual mi ta gusta mas, esta desafio. Esaki tambe tabata algo cu mi mentor den mi delaster periodo di stage (klas 5) a bisa mi. El a bisa mi cu el a ripara cu mi ta haci e trabou di maestro di curason pa mi alumnonan. P’esey m’a scoge pa traha cu mucha di scol basico. Tin mucha cu pa motibo di nan edad ta un desafio pa traha cu nan, pero si bo sa con pa crea un bon relacion cu nan, bo ta yega na saca lo miho di tur.”
IPA ta invita tur studiante di havo, vwo y mbo nivel 4 y tur otro persona interesa pa cuminsa un estudio pa maestro, pa asisti na su Dia Publico. IPA su Dia Publico lo ta diasabra dia 9 di november di 10or di mainta te 1or di merdia na IPA (Isaac Wagemakerstraat 11, San Nicolas). Durante e Dia Publico, IPA lo duna un bista general di e estudio di Maestro pa Enseñansa Primario. Esaki lo tuma luga den forma di un tour na unda bo lo ricibi informacion general di e estudio y bishita diferente area di formacion p’asina bo haya un bista completo di kico e estudio ta encera. Ademas, lo tin oportunidad pa combersa cu nos studiantenan actual. Di e manera aki, bo por scucha entre otro for di nan con e transicion di scol secundario pa IPA a bay, con nan ta experiencia nan estudio na IPA y sigur haya bon tips con pa studia na IPA exitosamente. En corto, bo lo experiencia e ambiente estudiantil!
Naturalmente lo tin oportunidad pa inscribi como studiante. Pa por haci esaki mester trece e papel di registro civil (papel di AWG 5) y paga un suma di AWG 75,- p’asina cubri e gastonan di inscripcion. Si bo a gradua caba, lo mester trece copia di bo diploma di sea havo, vwo of mbo nivel 4. Tene cuenta cu pa aña academico 2020 – 2021, e estudio pa maestro di enseñansa primario ta e unico estudio cu IPA lo ofrece.
Pa mas informacion por tuma contacto cu Studenten Services na 5243100 of por bishita nos pagina di facebook ‘Instituto Pedagogico Arubano’ of nos website www.ipaaruba.com.