Macuarima, Santa Cruz: Diahuebs den oranan anochi e agentenan policial di Warda di Polis di Santa Cruz a dicidi di pone trabou abou y a bay para pafo.
E motibo te na e momentonan aki no ta completamente cla. Tin fuerte indicacion cu ta relacion cu e droga cu recientemente a wordo intercepta, Y pa un of otro motibo autoridad no lo kier a lag’e mas na Marinierskazerne y a dicidi di hibe completo of parcialmente na e Warda di polis aki.
Aparentemente e droga ta sacando un holor fuerte, cu sigur no ta bon pa salud di hende. E motibo pakiko lo a hiba e droga na warda of wardanan di polis, tampoco no ta conoci. Segun nos a compronde inoficialmente, cu un di e motibonan lo por ta, cu tin mas confiansa den Cuerpo Policial Arubano. E droga ta keda trece riesgo cune, manera ainda ta fresco den nos memoria cu na Korsou algun luna pasa, mas cu 600 kilo di Cocaina a desaparece for di un warda di polis, a haci investigacion y a detene polis of ex polis.
Nos ta keda pendiente pa informacion oficial di e sindicato di Polis, tocante e motibo cu agentenan policial na Warda di Santa Cruz a dicidi den oranan di anochi pa pone trabou abou.
