Willemstad, Korsou:Djadumingu 13 di òktober 2019, alrededor di 18.58’or di atardi, unidat di mantenshon di òrdu públiko, a tuma nota di un bròmer i un ‘quad’ ku tabata pone ‘fever’ i stanka e tráfiko riba F.D.Rooseveldweg.
Na momentu ku e sospechosonan a tuma nota di e unidat aki nan a trata di kore bai. Durante di nan huida e shofùr di e bròmer a aksidentá den e vehíkulo polisial pa despues e lanta i sigui ku su huida na pia. Polis a start ku un persiguishon na pia tras di e sospechoso i a logra detené e hòmber aki.
Durante un kontrol den un tas pretu ku e sospechoso tabatin huntu kune, polis a bin haña i konfiská un arma di kandela. Na e sitio polis a detené e hòmber sospechoso A.M.M., nasé na Repúblika Dominikana di 23 aña di edat, pa violashon di e lei di arma di kandela. A present’é dilanti di un fiskal ouksiliar ku a ordená su enkarselamentu pendiente di mas investigashon.