Un biaha mas nos ta wak un ex Minister President Mike Eman ta para pa corupcion y mal uso di funcion den pais Aruba. Enbes di bin dilanti y pidi pueblo despensa y exigi retiro di su miembro Benny Sevinger e ta bin ta purba hustifica y benta riba partido MEP haciendo manera cu ta persecucion politico tin den e caso aki cu sigur lo tin un rabo hopi largo. Caso Benny Sevinger a sigui mesun procedura cu caso di ex Minister Paul Croes. Ora kier tilda MEP di tin influencia den Ministerio Publico ta un insulto pa e cadena hudicial na Aruba y tambe un degradacion di cada miembro di Cuerpo Policial cu tambe a traha den caso IBIS unda cu esaki a sosode bou di Gabinete Eman 2.
Ta AVP a denuncia Paul Croes
Ex Minister Paul Croes a pasa den mesun procedura pero e ora ey si nos no a scucha Mike Eman y Arthur Dowers. Pues mester conclui mirando nan insinuacion cu ta indica e ora cu ta Mike Eman y Arthur Dowers a instrui Ministerio Publico pa persigui nan ex Minister Paul Croes. Pasobra MEP no tabata den gobierno y nunca MEP a pensa mes cu Paul Croes tabata meti den algo ilicito. Pero straño cu e por zona ta defende Marco Espinoza, Nelson Andrade y Benny Sevinger hasta la muerte pero Paul Croes – pasobra e ta subrino di Betico Croes – nan mes a denunci’e na Ministerio Publico. Esey ta metemento pero sigur traicion na un miembro di nan partido pa purba scapa Benny Sevinger cu ta esun cu na final tabata duna permiso.
Ministerio Publico: un organo independiente
Nos di MEP ta sostene nos sistema democratico y sigur nos estado di derecho y ta respeta nos Trias Politica unda cu Ministerio Publico ta traha independiente y no ta tuma un accion si e no tin prueba y sigur den un caso contra un ex Minister. Awo nos mescos cu pueblo tin di laga Ministerio Publico haci su trabao trankilmente sin haci manera AVP ta haci, esta di purba influencia pensamento di pueblo riba e caso y purba influencia y duna Ministerio Publico mal nomber. Y sigur ta lamentabel pa hasta un ex Minister manera Dowers ta yama Ministerio Publico como avestruz. Esey ta muestra di desesperacion y sigur ex Minister Dowers mes ta esun cu a apunta e ex PG cu tabata esun cu a cuminsa tur investigacion.
Mike Eman y AVP ta un berguensa
Un partido cu tur ora su Ministernan ta den problema cu husticia y ta ser condena manera ex Minister Tico Croes, ex Minister Paul Croes y awo un hala di investigacion riba ex Minsiter Benny Sevinger y tambe lo tin mas den caso di RDA unda cu pueblo a ser masacra den nos refineria cu nunca a habri. Pues ora abo cu bo ruman semper a sostene corupcion ta un berguensa pasobra e mensahe eyfo ta: Join AVP, bira corupto y biba lekker!