Home Local #TeamMirna a causa un furor recaudando un record di suma den 3...

#TeamMirna a causa un furor recaudando un record di suma den 3 ora pa Mary Joan Foundation

SHARE

Oranjestad, Aruba – Señora Mirna Tromp (d.f.m.) tabata un persona cu semper tabata gusta yuda y tambe duna palabranan di estimulo na unda cu e bay. Sra Mirna sigur tabata resalta tur caminda cu su positivismo y amor pa bida. Asina tambe riba iniciativa di e yiunan di señora Mirna a wordo a crea e pagina di FaceBook ’Pull A Mirna’

Mirando cu señora Mirna semper a yuda, naturalmente pa sigui e idea aki e yiunan tambe kier sigui e paso di nan querida mama. Mary Joan Foundation ta un fundacion cu tabata hopi yega na curason di señora Mirna, kende a ricibi ayudo di e fundacion aki tempo e mes tabata bataya cancer di pecho. Sra Mirna tabata participa na tur actividadnan organisa pa e fundacion aki. E tabata modelo y hasta a ser eligi reina di e Mary Joan Foundation na 2014.

Mirando cu luna di oktober ta wordo considera e luna di conscientisacion contra cancer di pecho, ta precisamente e luna tambe cu e fundacion ta colecta fondo na diferente punto rond Aruba durante tur fin di siman. Asina aki tambe e dos yiu muhernan Cindy y Ruthline a bin cu e iniciativa pa colecta e prome diasabra di oktober parti mainta pa tres ora. A presenta e idea aki na amistades y familiarnan cu ta identifica nan mes como #TeamMirna y tur hende a bay di acuerdo pa ta parti di e mainta aki. Mas e dia tabata asercando, mas hende a sinti e gana tambe pa ta parti di e mainta aki. Asina aki a logra acumula suficiente voluntario pa para na 5 punto na diferente parti di Aruba.
Na final di dia ora cu esnan encarga di fundacion a hasi e conteo final, a yega na e suma di Awg 8.496,70 Un suma cu nunca antes a wordo recauda den un lapso di tres ora. TeamMirna kier a gradici henter pueblo di Aruba pa aporta pa tira den e buzon rosnan na e cinco diferente punto nan pa asina por a yega e suma menciona.

Palabra di gradicimento ta bai na cada un persona cu a duna tres ora di nan diasabra pa recauda pa esnan cu ta pasando den e malesa di cancer di pecho. Den nomber di e yiu nan kier a gradici: Nicholle Vrolijk, Nelitza Lampe-Tromp, Tyson Lopez, Ashanti Rodriguez, Rujina Comenencia, Maryanne Rodriguez, Tommy Lee Halman, Deborah Julen, Amandah Campos, Jesurine Croes, Aldrik Lampe, Andre Kelly, Elizabeth Croes, Nadine Tromp, Maurits Ras, Julissa Arends, Ansley Koolman, Germain Webb-Geerman, Jacinto Rasmijn, Maurella Ras.
Tambe kier a informa cu dia 26 oktober TeamMirna lo ta riba caya pa recauda fondo un bes mas pa MaryJoan Foundation. TeamMirna ta encurasha tur hende pa yuda e fundacionnan cu ta yuda esnan cu tin cu pasa door di e malesa aki. Haci bon di curason, bo tambe por ‘Pull a Mirna’.