Parlamentario Endy Croes a resumi e tratamento di e ley di Serlimar cual a wordo trata diamars ultimo durante un debate publico den sala di Parlamento. Minister di Infrastructura despues di mas cu un aña preparando cambionan den e Ley existente Landsverordering Instelling Servicio di Limpiesa di Aruba AB 2005 # 5 finalmente a yega parlamento pa wordo trata. Dilanti un sala yen yen cu testigonan di ambos banda, esta Serlimar y Ecotech a debati pa 14 ora largo y den oranan di anochi laat Presidente di Staten Ady Thijsen a schors e reunion y lo termina esaki dia 15 di october proximo. Un total di 20 orador a haci uso di nan derecho pa debati y haci pregunta.
Reunion cu hopi stakeholder
Minister Otmar Oduber na final di primera tanda a splica na placa chikito cu hopi detayes alrespecto e cambionan. En realidad pa hopi aña habitantenan di Parkietenbos y Simeon Antonio a sufri di e dump cu tin 70 aña eynan. Den programa di MEP pero tambe den e programa di gobernacion firma pa tur tres lider politico ta para textualmente: “Lo institui un comision di experto kendenan lo bin cu un solucion sostenibel y duradero pa dump Parkietenbos dunando preferencia na companianan local banda di Reduci Recicla y Re-usa”.
Alabes Parlamento a reuni cu masha hopi stakeholders manera AHATA, ATIA, KVK, Serlimar, Ecotech, Stichting Parkietenbos Aruba, diferente Comision den bario, a bishita famianan den Simeon Antonio alabes a bishita Ecogas y Seroe Tijsjie pa asina Parlamento por tin un bista mucho mas cla promer cu aproba e cambionan den e ley. Un cos si, tur e stakeholdernan tabata di acuerdo cu e situacion na Parkietenbos no por sigui y mester un solucion. Manera Parlamentario Endy Croes a splica, no tin tempo pa sigui papia so pero awor mester mira accion. Tin un rapport devastador di PAHO (Panamerican Health Organisation) di maart 2018 pa locual ta Parkietenbos. Parlamento a bini cu un amienda cu diferente cambio y Minister tambe a trece notanan di cambio cual a cubri deseo di diferente stakeholders.
Diferente cambio den e ley
A trece cambionan manera a saca afor exclusividad, companianan registra na Kamer van Koophandel lo mester paga Afl.300,- pa aña y aki tambe a alivia esaki agregando companianan cu no ta activo no lo mester paga. Un eenmanszaak inscribi na un cas tabata tin un tendencia cu nan lo haya dos cobransa, esta uno pa cu e meter di awa como referencia y e otro pa motibo di ta inscribi na KVK pero esaki a wordo corigi y lo paga solamente un biaha. Un werkmaatschappij of un holding unda companianan den dje tin su mesun zetel lo paga 1 fee so. A inclui un ‘evaluatiebepaling’ unda por evalua y ahusta e ley cada 3 aña. A inclui cu Parlamento lo ricibi un halfjaar rapportage. Esaki ta solamente pa menciona algun di e cambionan cu a inclui.
Mester bisa cu Minister Oduber den un forma hopi habri tabata cooperativo pa cu cambionan proponi cual lo wordo eherce momento nos trata e ley den segundo tanda pa bay pa votacion. Meta final di e cambionan aki ta pa por logra CERA Parkietenbos den 2020 y traha un Sanitary Landfill nobo unda na un manera strucura lo bay deposita sushi den futuro.
Hunto nos lo haci cambionan grandi pa e pais aki, Endy Croes ta termina bisando.