Un pareha na Austria a haci un pedido di paña for di un ‘compania’ na Hulanda, pero ora e pedido a yega na nan porta di cas, algo lo a bay full robes, enbes di a haya paña, nan a haya un cargacion enorme di droga hinka den e caha.
Linz, Austria: Un pareha cu ta biba na e cuidad di Linz, na Austria, algun luna pasa a haci un compra online di algun paña for di un compania na Hulanda. E pareha wardando riba e pañanan nobo, a haya nan cu un sorpresa na momento cu e pedido a yega na nan porta di cas. En bes di a haya paña den e caha, nan a haya un cantidad di pakete conteniendo cada un, 10 mil pildo di XTC. Esaki na balor di mas o menos mey miyon euro na pildo.
E caso aki a sosode algun luna pasa, pero pa un of otro motibo, autoridad na Austria a trata e caso aki hopi discreto y ta te cu awe a sak’e den publicidad.
E cargacion di XTC tabata destina pa un persona na Schotland. E pareha manera cu nan a haya e cargacion di droga aki a bay mesora na polis, cu a cuminsa di biaha cu un investigacion.
Despues di un investigacion extenso nan a logra haya un sospechoso y ela keda deteni na su cas na Schotland, e cargacion di e pildonan di XTC tabata destina pa e sospechoso aki biba na Schotland, un caminda algo a bay completamente robes cu e cargacion a yega te na porta di e pareha na Austria.
E caso ta keda bou investigacion, identidad di e persona cu a manda e cargacion for di Hulanda ainda no ta conoci.