Partido AVP tabatin varios dia tras di lomba caminda a organisa evento di yenamento di documento di inkomstenbelasting y hopi hende a pasa na Cas di Partido. Door di e demanda di comunidad pa yenamento di documento di inkomstenbelasting, Partido AVP ta informa fechanan nobo pa asina brinda nan servicio.
Partido AVP ta haci un invitacion cordial na comunidad pa yega cerca nan cu e documento di inkomstenbelasting. Lo tene na cuenta cu si despues di e fechanan aki ainda tin necesidad lo pone fechanan adicional pa sigui yuda tur hende.
Un biaha mas lo tin 4 sesion, unda lo tin diferente team cu lo duna asistencia na esnan cu mester di dje. E prome sesion lo ta diamars 24 di september pa 6:00-9:00pm na Cas di Partido Playa, e di dos sesion lo ta diamars 1 di october y lo ta di 6:00pm-9:00pm na cas di Partido Playa. E tercer sesion lo ta diasabra 5 di october pa 9:00am-1:00pm na Centro di Bario Lago Heights San Nicolas. E ultimo sesion lo ta diamars 8 di October pa 6:00-9:00 pm. Pa facilita e proceso pa hendenan no warda hopi, por yama Cas di Partido AVP na 583-0911 y traha un afspraak riba e dia di sesion preferi.
Parlamentario Candelaria ta enfatisa y ta recorda tur hende pa trece tur documento necesario – papel di SVb, papelnan di banco, rental- pa asina nan por yena e documento di inkomstenbelasting den un solo biaha y ta cla pa entrega. Partido AVP tin un team grandi cla pa sirbi comunidad di Aruba, pero pa cada sesion lo bay tin 6 mesa cu lo ta trahando continuamente. Ta gradici tur pa e confiansa, e aña aki pasando e record di aña pasa caminda riba 600 hende a keda yuda. E aña aki e yenamento di documento di inkomstenbelasting ta completamente digital y esey lo haci e procedura un tiki mas lihe. Por yama Cas di Partido na 583-0911 pa un cita y gustosamente nan ta cla pa yuda comunidad di Aruba. Tambe pa mas informacion por bay riba Facebook page di Robert Candelaria y/of Facebook page di AVP.