Gobierno di Aruba hunto cu Inspectie Onderwijs, basa riba e pronosticonan di Meteo pa e dianan venidero, a dicidi pa cera tur scol cu no tin airco mas tempran. Esaki debi na e calor inmenso den e temporada aki. Minister Lampe a indica cu e calor aki ta debi na e “climate change” cu mundo ta pasando aden.
Mirando cu Aruba ta pasando den e calor inmenso aki, a dicidi pa bienestar di nos muchanan, cu tur scol cu no tin airco lo ahusta e rooster pa asina e muchanan aki por bay cas pa 11 am. Ta di suma importancia pa cada mayor y maestro tene cuenta cu si un mucha no ser busca lo e keda scol te e ora respectivo cu su mayor por bin busce.
E titular di Enseñansa, Minister Rudy Lampe, a duna di conoce cu ainda tin varios scol cu no tin airco actualmente. Un motibo pa esaki, segun Minister Lampe, ta cu ta rekeri varios mantencion di e scol prome cu por instala airco. Pero e situacion financiero di pais Aruba y e paro cu CAFT a pone na Proyectonan PPP pa te despues di 2021, ta pone cu Gobierno di Aruba no por a sigui na e momentonan aki cu e renobacionnan di scolnan y lo por continua te despues di e aña stipula.
Minister Rudy Lampe ta pidi encarecidamente na tur mayor pa tuma e situacion aki na serio y busca nan yiunan na scol trempan (11 am) pa asina evita expone nan na e clima cayente aki cu Aruba ta experenciando.
E decision aki lo keda na vigor desde diahuebs 19 di September 2019 te cu e siguiente aviso.