Home Politics MENSAHE DI PROME MINISTER: “Gabinete Wever-Croes ta trahando duro tur dia...

MENSAHE DI PROME MINISTER: “Gabinete Wever-Croes ta trahando duro tur dia pa controla y elemina herencianan negativo di e gobierno anterior y cambia rumbo di nos pais”

SHARE

Nos pais ta enfrentando retonan hopi grandi y historico. Retonan interno, regional y tambe den Reino. 8 aña largo tabata tin un gobierno, prome cu nos, cu a mal maneha Aruba financieramente cu consecuencia un debe gigantesco. E Gobierno di AVP a priminti un di tres pilar economico, pero nunca a logra habri ni e di dos pilar. Nan a gasta placa manera cu no tin mayan, a stroba Gobierno y gobiernonan di futuro di funciona. Centenares di persona a wordo emplea den servicio di gobierno. Nan a neglisha atencion y inversion den educacion y den e situacion social di nos pais. Y nan a permiti corupcion. Gabinete Mike Eman a haci Aruba su situacion insostenibel.

Sinembargo Gabinete Wever-Croes ta trahando duro tur dia pa controla y elemina herencianan negativo di e gobierno anterior y cambia rumbo di nos pais. Pero no ta facil, prome nos mester controla e consecuencianan directo di e mal maneho y stabilisa e efectonan riba corto, mediano y largo plazo.

Awe mi kier ilustra con nos a haya nos pais na aña 2017, ora cu nos Gobierno a sinta. Kico nos a haci caba y kico nos por spera den e temporada nos dilanti.

Na aña 2017 e situacion financiero tabata hopi mas serio cu nos por a imagina. Ni e Institutonan cu mester a supervisa y controla nos pais, tabata conoce e situacion real. Tanto Gobernador Refunjol e tempo ey como Algemene Rekenkamer como Raad van Advies tabata duna aviso na gobierno anterior, pero e gobernantenan e tempo ey a dicidi di no sigui e avisonan pero mas bien nan a ofende e institutonan aki. Y asina a redobla e debe nacional di pais Aruba den apenas algun aña di gobernacion di Gabinete Mike Eman, yegando 90% di nos GDP.

Corupcion a bira un cultura durante gobernacion di Gabinete Mike Eman y a causa cu hopi sector a bira victima di e mal gobernacion aki. P’esey no a sorprende ningun hende ora cu e escandalo a bira conoci di e corupcion mas grandi cu nos pais a conoce cu e ex Minister di Labor di Gabinete Mike Eman.

Esnan di mas vulnerable socialmente y esnan den enseñansa a wordo neglisha. Un cantidad di scol te cu awe ta cera y otro cu mester a construi no a wordo construi. Nos a encontra pues un pais bayendo cu un velocidad halto den un rumbo robes, un rumbo di debe, di corupcion y negligencia di e ser humano su necesidadnan.

Y sin lubida con debi na nan mal maneho, nos pais su futuro y su status den Reino a ser afecta seriamente despues cu intervencion di Hulanda por medio di CAFT.

Pesey apenas despues di algun siman trahando inventarisando e situacion nos a dicidi mesora pa frena e velocidad di decadencia y stabilisa e situacion pa e no sigui bira peor. A cuminsa pa tuma e prome pasonan pa para e rumbo robes, y hiba nos pais den e direccion nobo y corecto.

KICO NOS A HACI?

Nos a cuminsa prome cerca nos mes. Apesar cu nos no a logra formacion cu 7 minister, nos gastonan di e 8 minister a baha cu 20 miyon florin compara cu e 9 minister prome cu nos. Nos a cuminsa cu corta den gasto di e personal cu ta traha cu nos. Por ehempel e ex Prome Minister Mike Eman cierto momento tabata tin riba 200 hende ta traha p’e. Ora CAFT a bin Aruba, el’a hay’e obliga di corta den esey pero asina mes el’a keda cu 147 persona riba su payroll te na final.

Ami ta trahando cu 20 persona. Haciendo e enormemente dificil pa cumpli cu tur e trabounan pero nos ta logrando si cu hopi menos hende, haciendo hopi mas trabou, y miho trabou tambe.

Nos a sigui corta den tur e gastonan, incluyendo e gastonan di biahe y e gastonan di e oficinanan. Eynan nos a cuminsa cu scapa pais Aruba 20 miyon florin.

Nos siguiente paso tabata di haci un apelacion riba nos companianan estatal pa nan tambe baha gasto y paga nan fair share, pues dividendonan mas halto na Gobierno pa cubri e necesidadnan den comunidad.

Nos di tres paso tabata pa bay na esnan cu no tabata pagando nan impuesto y fortifica Departamento di Impuesto, cu a wordo haci desfuncional door di gobierno anterior. Pasobra no ta husto cu tin hende cu no ta paga impuesto, y otronan si. A base di e esfuersonan aki e entradanan di impuesto a cuminsa subi caba.

Esey tampoco tabata suficiente y aña pasa na juli, contra nos plan y contra nos deseo nos mester a introduci e crisistax temporal pa cubri e deficit y e debe grandi di e proyectonan PPP.

Despues di esey a bin un periodo den cual nos a sigui concentra riba cambia e direccion cu nos pais tabata bayendo, di e rumbo robes pa e rumbo positivo. Nos ta determina pa cambia e rumbo. Nos tin un plan y nos ta ehecutando e plan aki, den consulta cu gremionan, den tur transparencia – talves dimas transparencia.

CAMBIANDO RUMBO PA UN DIRECCION MIHO

“Aki mi kier haci un comparacion cu un trein. Un trein cu ta bayendo den velocidad halto den un rumbo, y nos kier pa e cambia rumbo completamente den otro direccion. E trein no por haci e cambio di direccion mes lihe cu lo nos kier, e ta tuma su tempo. E no por bira e bocht cortico. E no por dal un “U-turn” abruptamente. Pasobra pa cambia e rumbo di decadencia cu e trein tabata bayendo, na velocidad hopi halto, e ta exigi un bocht grandi.

Si mi compara Aruba cu e trein ey, awor nos ta den e bocht. Den e bocht aki nos ta trahando, den consulta cu gremionan, den transparencia.

Awo, kico ta pasa ora un trein bayendo cu velocidad hopi halto mester cambia di rumbo abruptamente? Tin Resistencia y tin tin descontento.
Tin hende cu tabata gusta e rumbo cu nos tabata bayendo, y nan ta lanta awor pasobra nan no kier cambia e rumbo. Aki mi ta referi na tur e casonan di corupcion cu nos a mira, y cu ainda poco poco ta lanta cabes, manera den e refineria.
Den e bocht aki nos ta mira tambe hopi resistencia di nos ciudadanonan, y mi ta compronde esaki. Mi ta contento di mira cu nos hendenan ta liber atrobe pa manifesta nan preocupacionnan, sin mester wordo menasa cu lo manda RIOT commando of cacho riba nan ora nan manifesta, pasobra esaki tabata e caso durante gobierno anterior.

Mi ta compronde e preocupacionnan cu ta biba den comunidad. Mi tambe ta sinti nan, mi ta convivi cu nan, y pesey mi ta tuma tempo pa atende nan, un pa un, cada un.

Importante pa bisa ta, cu e trein cu e gobernacion anterior a laga Aruba cu ne, tin garoshinan, wagonnan carga cu debe, corupcion y problemanan. E pasonan cu nan mester a tuma pa cambia e direccion na tempo, nan no a tuma tampoco, cual a haci cu e velocidad y presion den e bocht cu nos mester tuma, ta bira mas intenso.
E mal maneho di AVP y e falta di tuma accion na tempo pa frena e situacion, a haci cu e situacion financiero manera ya mi a splica, a deteriora rapidamente. Y p’esey awor e situacion ta serio. E situacion financiero ta asina serio cu e ta menasando bienestar y futuro di nos pais, si nos no haci nada. P’ESEY nos mester tuma nos responsabilidad y haci algo awor.

Den e situacion aki no tin un forma pa cambia e rumbo, cu no ta dificil. Cualkier otro partido politico tambe mester a atende cu ne y nan tambe lo mester a tuma pasonan dificil. Nan tambe lo mester a evalua un of otro tipo di crisistax. Nan tambe lo ta sinta cu e problema cu mester baha gastonan di Gobierno, specialmente gastonan di personal.
No tin un caminda facil pa sali di e problemanan cu nos a hereda. No tin shortcut. Y mi sa cu no ta husto, pasobra no ta abo a ocaciona e debe y esunnan cu a ocacion’e mes ta cana liber rond, haciendo manera nada un pasa.
Sinembargo nos no por bira cara tampoco y haci manera e debe no ta existi. Nos no por djis pasa e debe aki na nos yiunan y nan yiunan. Ta nos deber y responsabilidad pa crea un Aruba sin debe pa nos futuro generacionnan.

Pero conciudadanonan pa un motibo e ta, cu nos Creador, a pone mi aki awe, como un persona cu ta domina e area di cifra y asuntonan fiscal, cu destino a pone mi na control di e trein cu tabata bayendo den direccion di un precipicio profundo y cu efectonan devastador. Hunto manera un ekipo e Coalicion MEP POR RED ta tumando e pasonan pa tuma e bocht. Nos SI no ta core baha for di e trein, core pa nos responsabilidad of bay den welga di hamber.
Nos ta trahando riba otro alternativanan pa cumpli cu nos debernan financiero. E gap financiero no por y lo no wordo cera cu aumento di impuesto so. P’esey mes NO tin ningun decision tuma riba e sugar tax. E gap financiero mester wordo cera cu crea desaroyo economico. Nos ta trahando riba varios otro formanan creativo, responsabel y structural pa Gobierno por haya entrada. Nos no ta cla ainda, nos mester di poco mas tempo, y esey mi ta pidi di comunidad.

Mescos cu den e ehempel di e trein, nos ta den e bocht y nos ta na caminda pa sali di e bocht. Una bes cu nos sali di e bocht, e trein por core trankil y stabil, sin mucho resistencia, den e rumbo corecto. E rumbo di Progreso y Bienestar.

Mi mester remarca cu ya caba nos a cuminsa mira señalnan cu nos ta saliendo di e bocht dificil. Nos pais a bira mas sigur, cu binida di e helicopter y pronto e radar. Ciudadanonan cu tabata tin 10, 20 aña ta warda riba un tereno a haya nan tereno y por construi nan hogar.
Nos a frena e desaroyo di corupcion, y a introduci e oficina di integridad.
Nos Universidad a haya un facultad nobo, asina brindando nos hobennan mas oportunidad pa studia den nos region.
Turismo ta bayendo bon, y nos ta mirando un aumento di turista y di entradanan di turismo di casi 9%.
Nos Economia ta creciendo e aña aki cu 2.4% y otro aña ta premira crecemento di 3%.
Desempleo ta bahando, specialmente desempleo di nos hobennan, pasobra nos ta creando cuponan di trabou pa nos hendenan prome.
Riba tereno di Finansas, nos ta ganando e confiansa bek di institutonan financiero, cu e plan cu nos a presenta. IMF S&P y hasta CAFT a duna nos evaluacionnan positivo.
Nos no a yega ainda na unda nos mester ta, nos no a sali di e bocht ainda, pero nos a frena e velocidad di trein den e rumbo di decadencia. Y Nos ta tumando e bocht y ta stabilisando e situacion.

Pronto nos lo mira mas desaroyo. Por ehempel un cadena prestigioso Radisson Blu cu a pone su confiansa den Aruba recientemente, y Iberostar ta na caminda.
Specialmente den e area di San Nicolas, nos ta mira oportunidadnan grandi. SNBA a trece varios inversionista hunto caba y Gobierno awo lo bay yuda nan pa realisa nan proyecto.
Pa prome biaha den historia di nos pais ta mustra cu nos ta bay logra haya un Hotel na San Nicolas. Mi ta consciente cu tin resistencia, pero mi ta consciente tambe cu den comunidad tin e consensus cu nos pueblo ta scoge pa e hotel y su desaroyo en bes di mas medida. Nos ta buscando alternativa, en bes di medida. Baby beach, San Nicolas Ports Authority, Fast Ferry, Refineria, y Terminal cu pronto lo ta den nos man y por genera ganashi. Tur e desaroyo aki ta dirigi riba crea cupo di empleo pa nos hendenan prome.

Mi wela tbt bisa, speransa ta e ultimo cos cu bo por perde. Y esey mi kier laga boso cu n’e, e mensahe di speransa. Mi ta segura boso cu nos ta den e bon rumbo y pronto cu poder di Dios, y comprension di boso tur, nos lo sinti e rumbo nobo, e rumbo di progreso y bienestar pa tur ciudadano.
Gabinete Wever-Croes no a ocasiona e problemanan financiero di nos pais, pero nos ta determina pa soluciona nan si. Loke nos mester ta poco mas tempo y espacio pa logra esaki. Mi ta spera di por conta riba bo comprension y sosten den esaki. Ami tin tur confiansa cu nos lo logra.
Cu Dios bendiciona cada cuidadano di nos pais Aruba.

Evelyn Wever-Croes
Prome Minister di Aruba