Home » Minister Chris Romero cu iniciativa pa introduci un ‘Taxi App’ pa e taxistanan registra

Minister Chris Romero cu iniciativa pa introduci un ‘Taxi App’ pa e taxistanan registra

by Admin
0 comment 65 views

Un di e problemanan cu mas ta surgi actualmente den e mundo di transporte publico di Aruba, y cu keto bay Minister Chris Romero ta purba bringa, ta e entrada di e diferente aplicacionnan di transporte cu ta existente na diferente pais den nos region. Ta practicamente 2 aña caba cu Minister di Transporte ta haciendo tur loke ta den su poder pa evita cu aplicacionnan mobil manera, Lyft, Uber, Gett y etc. cuminsa funciona na nos pais.

Durante su conferencia di prensa na Cocolishi, Minister di Transporte, sr. Chris Romero, a splica mas detayadamente di su iniciativa pa introduci un asina yama ‘Taxi App’. E aplicacion mobil aki lo ta exclusivamente pa tur taxista cu ta registra y cu ta den poder di un permiso reglamentario pa eherce e trabou aki. “Nos mester ta realistico cu mundo ta cambiando. Tecnologia ta avansando constantemente. Turista ta exigiendo diferente servicio y nos taxinan por brinda esakinan, pero mi ta sigur cu un aplicacion mobil lo haci e trabou mas facil”, Minister Romero a duna di conoce.

Tipo di aplicacionnan mobil di transporte manera esun cu Minister Chris Romero kier introduci, a keda implementa pa Gobiernonan na diferente pais di Europa cu e meta pa precisamente mantene e competencia externo, y tin biaha inhusto, leu di e taxistanan local. Cu e pensamento aki Minister Romero a institui un comision pa analisa e probabilidadnan pa Gobierno di Aruba introduci un aplicacion di e tipo aki, y kico lo ta e beneficionan pa nos taxistanan. Na prome bista e beneficionan pa nos taxistanan local lo ta grandi, cuminsando for di e hecho cu e turista por sinti mas sigur di sa cu e lo ta coriendo cu un persona certifica pa e autoridadnan local, pero tambe e accesibilidad y facilidad pa yega na un taxi for di unda cu nan por ta. Y esaki ta simplemente pa menciona algun di e hopi beneficionan cu e ‘Taxi App’ lo trece cun’e.

E titular di e cartera di Transporte a pone como un di su metanan den transporte publico pa reglamenta y facilita e trabou di nos taxistanan mas hopi cu ta posibel. Ta pa es motibo cu ta mira e ‘Taxi App’ como un herment valioso tanto pa nos taxistanan, como pa e usuarionan di e servicio di taxi. E ‘Taxi App’ tambe lo ta e prome paso firme pa cuminsa combati e fenomeno di taxi pirata na nos pais, door di duna nos taxistanan un herment mas atractivo y dinamico cu por uza den diferente manera y na nan beneficio.

Prome cu introduci e ‘Taxi App’ oficialmente, e titular di e cartera di Transporte lo sinta na mesa cu e taxistanan pa asina, hunto cu nan, delinea e mihor manera pa pone e ‘Taxi App’ funciona na nan beneficio. Segun Minister Chris Romero a declara: “Naturalmente, prome cu introduci e ‘Taxi App’ lo pasa diferente ronde caminda lo sinta cu e diferente gruponan di taxi pa duna nan e informacion debido, pero tambe lo bin cu un projecto piloto prome cu e aplicacion wordo introduci definitivamente”.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio