Locual a sali den prensa recientemente di cu DIP lo a kita tereno for di un famia, no ta berdad. E Gobierno aki no a kita ningun tereno for di ningun hende”, esaki tabata declaracion di director di DIP sr. Haime Croes diaranson mainta den rueda di prensa.
Sr. Croes a splica cu e tereno huurgrond en cuestion di sr. Giel a wordo kita na 2016 door di ex Minister Benny Sevinger. Ora cu a kita e tereno a manda un carta pa sr. Giel, indicando cu a kita e tereno, e carta aki tabata firma pa e director di DIP e tempo ey. Esaki ta significa cu desde 2016 no ta permiti tin actividad riba e tereno.
Huurgrond ta tereno di Gobierno cual Gobierno por kita esaki a base di prioridadnan cu tin. Banda di esaki ta imporante pa e persona cu tin esaki cumpli cu e condicionnan. Un huurgrond mayoria bes ta traha pa landbouw of veeteeld, sr. Croes a splica. Ta importante pa trece pa dilanti cu Gobierno tin un maneho cual ta indica claramente cu ta traha na bienestar di pueblo, pues tur hende mester por hiba un bida trankil. E tereno aki por cierto ta den ‘groengebied’ desde 2009 caba, cual ta indica cu no mag di tin construccion pasobra e ta proteha. Pues considerando esaki tambe ta otro punto cu ta ilustra cu no mag di tin nada na e localidad.
Sr. Croes ta sigui splica di e diferente intentonan pa yega na para e operacionnan riba e tereno, na luna di mei, sr. Croes como director na DIP a splica cu e ta ricibi un yamada informando cu yen di truck ta bayendo e tereno y cu bisiñanan ta cuestionando locual ta tuma luga. Polis a presenta na e sitio y a para e personanan y bisanan cu e tereno no ta di nan y nan no tin mag di ta eynan. Pa motibo cu e personanan no kier a tende, e situacion a bay mas leu y a yama nan na oficina di DIP.
Director a percura pa bisanan un bes mas cu e tereno ta di natuur y cu e tereno a wordo kita for di nan algun aña prome (2016) y pues cu e tereno cu tin na e sitio ta publico y cu esaki ta un pasada pa e esnan den e besindario. Na e ocasion a bolbe mustranan cu mester cumpli cu ley. Ademas a bisanan cu ta dispuesto pa yuda nan cu un tereno di huur pa haci landbouw. Na Augustus yamada ta bolbe drenta bisando cu e ta bira cada bes mas pio, pa cual DIP a manda dos carta pa e famia, uno dia 13 di augustus y otro dia 22 di augustus.
Den e di dos carta, en conexion cu e carta di 13 di augustus, DIP a informa lo siguiente:
‘Pa medio di e carta aki, DIP ta pidi boso confirmacion por escrito cu boso ta bay di acuerdo pa des-aloha e tereno en cuestion. Den e periodo cu DIP a otorga pa haci esaki, esta dos luna. Pues ultimamente pa 13 di October, e tereno mester ta completamente des-aloha. Den caso cu no haya confirmacion por escrito dentro di un siman cu ta bay di acuerdo cu esaki, DIP lo instrui DOW pa des-aloha e tereno. Pa medio di e carta aki tambe DIP ta participa cu e hekinan poni riba e tereno en cuestion lo wordo remove door di DOW.’
Di e forma aki sr. Croes a mustra cu e famia tabata na altura cu e tereno aki ta uno publico y tambe di e pasonan di Gobierno. Pa cual ta haya straño cu a duna entrevista sin presenta e cartanan di DIP den cual ta para bon cla, con e situacion realmente ta hinca den otro. Pa conclui sr. Croes a bisa cu ainda e famia tin e opcion di presenta na DIP pa papia y wak si nan kier yega na huurgrond pa landbouw cu e condicionnan cu DIP tin. Pasobra e Gobierno aki ta di tur hende, pero tambe tin regla cu tincu mantene na dje.