Durante fin di siman a tuma nota cu e compania Serlimar ta hopi den combersacion den media. A scucha ex prome Minister Mike Eman cu a bin dilanti cu cantidad di mentira. Un di e mentiranan aki ta, cu lo tin aumento di 17.50 riba tarifa di recoge sushi di Serlimar.
En bes di a haci esaki sr. Eman mester a sali dilanti y splica comunidad den ki estado el a laga e compania Serlimar. Pasobra e Gobierno aki a haya Serlimar cu mas di 12 miyon florin cu no tabata wordo paga di placa cu ta kita di loonbelasting, AZV entre otro primanan social di e trahadonan di Serlimar. Pueblo ta corda con mester a atende cu APFA cu na cierto momento a manda carta pa tur trahado pa motibo cu durante 3 pa 4 aña no tabata contribui na APFA y cu ta retira nan for di e fondo di pensioen. Gobierno mester a regla esaki, pagando e suma cu ta parti di e 12 miyon cu tabatin na debe. Ademas sr. Eman a percura pa algun dia prome cu eleccion na 2017, hinca 57 ploeg den Serlimar na un balor di 7 miyon florin pa 5 aña. Esaki sin cu a percura pa e presupuesto pa Serlimar y un contract cu e Gobierno aki no por mishi cu ne, Minister Otmar Oduber a splica.
A pesar di esaki, comunidad por tuma nota di un Serlimar cu ta dunando un servicio fantastico na comunidad, cu trucknan nobo pa brinda mihor servicio y cu barinan nobo cu durante 8 aña cu sr. Eman tabata den Gobierno no a cambia. Esaki a haci cu e clientenan tabata perde confiansa den e compania. Pesey mirando e situacion cu Serlimar a wordo encontra aden, e mentalidad negativo di sr. Eman, den cual e ta trata na hinca panico den comunidad ta sumamente lamentabel.
Responsabilidad nacional di Serlimar
E ta sumamente importante pa comunidad realisa cu e tarifa di 25 florin no ta subi cu ningun cen!, Serlimar ta recoge 95% di sushi residencial aki na Aruba cu ta representa 37 mil cas. Apenas 5% ta wordo recogi pa otro companianan, pa cual no por ta asina cu otro companianan ta cobra e mesun tarifa cu Serlimar ta cobra, pero Serlimar tincu percura pa:
- Tene Aruba limpi
- Corta tur mata pa autonan no rasca y por pasa
- Recoge bestianan morto di riba caminda
- Recoge sushi di casnan cu no paga e compania priva (como responsabilidad nacional!)
- Ta organisa milieustraat den barionan pa pueblonan deposita sushi den baki, entre otro!
Al contrario, e compania priva unico cos cu e ta haci ta recoge e sushi, y tira esaki pa Serlimar atende cu ne, cobrando mesun suma cu Serlimar. Esakinan ta puntonan cu comunidad mester para keto, tuma tempo y pensa riba dje.