Hopi reunionnan y cu resultadonan positvo e importante pa nos país, ta caracterisa e biahe cortico di trabou na Aruba di Minister Plenipotenciario pa Aruba na Washington DC, Joselin Croes.
Minister Plenipotenciario Croes a reuni cu Conseho di Minister y cu e Minister President.
No obstante e hecho cu Venezuela ta keda un prioridad grandi pa e Minister Plenipotenciario pa Aruba na Washington DC, colaboracionnan riba tereno di educacion y proteccion di nos medio ambiente tambe ta halto riba e agenda di Minister Plenipotenciario Croes.
Minister Plenipotenciario Croes a duna un presentacion amplio di e oportunidadnan pa Aruba pa cera colaboracionnan cu varios Estado na Merca y/of institucionnan Mericano. Por ehempel, e Memorandom of Understanding entre City of Boston y Aruba lo trece cu ne varios partnership entre departamentonan di Gobierno, Universidad di Aruba, riba Youth Employment and Leadership, Global Resilience Research, introduccion di on-line degrees y blended learning, entre otro.
Tambe, nan a mustra hopi interes pa wak kico Aruba ta haciendo cu su infrastructura pa wak si eynan tambe tin oportunidad pa colaboracion. For di e Sister City Agreement entre Aruba y City of Doral pronto lo bin un Trade Mission y tambe promocion di e buki Curasonchi na algun scol na Doral. E ekipo di Oranjestad Sister Cities Aruba (OASCA) dirigi pa Ralph Romsom y un ekipo di Arubiano bibando den exterior kier logra tres Sister Cities Agreement mas cu entre otro Illinois, New York y Silicon Valley.
Un tema cu tin hopi atencion awor na Merca y na mundo ta e movecion di Green economy pa Blue economy cual ta e economia sustenibel cu ta proveni di bo laman. Pa cu esaki Minister di Finansas y Economia hunto cu Minister di Infrastructura y Medio Ambiente lo biaha pa e IMF/WB anual meeting na october pa reuni cu WB riba e tema y pa tambe reuni cu varios NGO’s trahando riba e ramo aki pa logra cera partnerships pa ayudo tecnico, expertisio y fondonan.
Minister Plenipotenciario Joselin Croes ta contento di por presenta su trabou y oportunidadnan na Conseho di Minister y Minister President.