ORANJESTAD — Partido MEP a tuma nota di atakenan di Marlon Sneek riba lider di MEP Evelyn Wever-Croes.
“Nos lider no ta bay reacciona riba e Parlamentario Sneek. P’esey nos ta hasi’e.
Marlon Sneek tin dos siman sin aparece na trabou. El a rabia cu Gobierno kier a duna cuenta na Parlamento. El a core pa su responsabilidad.
Pa colmo el a uza como excusa cu e rapport di CAFT no tabata cla. Awor e rapport ta cla y e ta un DIKKE VOLDOENDE pa Gabinete Wever-Croes, pero Marlon Sneek no a yama reunion ainda.
HENDRIK CROES
Manera Lider di MEP a contesta varios biaha den Parlamento, e mes no ta uza servicio di ningun abogado, contrario na Mike Eman cu tabata paga miyones na Hans Sjiem Fat. Lider di MEP a bisa tambe cu el a urgi e companianan estatal cu ta resorta bou su ministerio, pa no haci uzo di e bufete di su tata Hendrik Croes.
RdA a tuma e decision riba su mes – nan a declara esaki tambe na prensa – pa toch busca e servicionan di Hendrik Croes ora nan tabata tin mester di un abogado pa asisti nan den negosacion cu Citgo. Pa e decision aki, RdA no mester di aprobacion di e Minister. Pa tur demas tipo di caso RdA ta uza otro bufete di abogado. Solamente pa negocia cu Citgo ta uzando servicio di Hendrik Croes su bufete.
RdA a scoge pa e bufete aki mirando tur e experiencia cu nan tin riba tereno di negocia cu refineria y mirando cu na e alturanan aki RdA mester di e miho conseheronan pa yuda nos sali di e abismo cu AVP y Richard Arends a hinca RdA aden. E otro opcion tabata pa busca servicio di Hans Sjiem Fat, un Abogado amigo intimo di Mike Eman. Esun cu a hinca Aruba den e contract cu Citgo y a cobra miyones bou gobierno anterior. Ta logico cu RdA no ta bay uza e mesun Abogado cu a hinca nan den problema!
CUANTO BUFETE DI CROES WEVER RUIZ A COBRA
Parlamentario Marlon Sneek a puntra cuanto e bufete a cobra. Si Marlon Sneek ta bay trabou, e lo sa esey. Si Marlon Sneek a presenta na e debatenan ultimo, e lo sa esey pasobra tur e pagonan a wordo poni “ter inzage”. E pagonan di Hendrik Croes y pagonan di Hans Sjiem Fat tambe. Lider di MEP mientras tanto a contesta e preguntanan di Parlamentario Sneek y ta di spera cu Sneek saca su conclusion: si bo mes dicidi di no asisti na reunion, ta abo mes ta sali perhudica! No pone otro hende perde tempo valioso cu bo e ora. Lider di MEP mester goberna nos pais!