Alabes ta invita pueblo en general pa ban tur hunto gosa di e actividadnan relaciona cu celebracion di Dia di Brazil y hunto nos engrandece un actividad cultural hopi bunita.
Durante di e rueda di prensa di dialuna mainta Parlamentario Tromp-Lee a informa cu diasabra anochi el a asisti na e eleccion di Reinanan Cultural. Un anochi yena di historia, custumber y tradicion, musica y ambiente. Un berdadero explosion cultural. Un actividad hopi exitoso y bon bishita. Pa e motibo aki mes Tromp-Lee kier a felicita e comision organisador completo y tur nos reinanan cultural. E comision organisador ta consisti di Fundacion Chico Harms, Centro di Bario Brazil y Comision Eleccion di Reina y Parada Folklore Cultural.
Tromp-Lee ta informa cu e eleccion ta forma parti di e actividadnan cultural relaciona cu celebracion di Dia di Brazil. E comision organisador ta celebra Dia di Brazil tur aña e prome siman di september pero ta organisa diferente actividad pa celebra e dia aki.10 aña pasa tabata prome biaha cu na un manera spontaneo e idea a nace pa celebra un fiesta cultural na Brazil. Dia cu a inaugura Caya Bernadina Growell tabata prome biaha cu a organisa un parada cultural. E tempo ey a subi caya cu mas o menos 250 participante y awendia e parada ta conta cu aproximadamente 1800 participante.
E eleccion ta un competencia cu ta enfoca riba carisma, elegancia, forma spontaneo di presenta y manera di trece mensahe y show dilanti. E aña aki e shownan di apertura tabatin como tema: Flora, Fauna, Naturalesa y Cushina di Mama. Cada participante a presenta un bunita mensahe relaciona cu Aruba su cultura, historia, folklore, tradicion, identidad y idioma Papiamento. Accento special a keda poni ariba nos musica local y trahenan oficial di antes. Riba nan mes cada un participante a luci riba stage y a aporta pa haci e actividad uno exitoso.
Banda cu semper e ta asisti na e actividadnan, na su manera Parlamentario Tromp-Lee, kier alabes duna atencion na e actividadnan y yuda promove esakinan. Ainda tin 3 dia di actividad esta:
30 di augustus Parada di Lanterna cu ta cuminsa 7’or di anochi;
1 di september lo tin un misa na Cristo Rey 9or di mainta, Bario Fest na CBB di 10:00 am-2:00 pm, y e grandioso parada di Brazil cu lo cuminsa pa 3or di atardi;
7 di september clausura di Dia di Brazil, Show Multi-Cultural na Centro di Bario Brazil di 8:00 pm-11:00 pm
Tromp-Lee ta invita pueblo en general pa ban tur hunto gosa di e actividadnan relaciona cu celebracion di Dia di Brazil y hunto nos engrandece un actividad cultural hopi bunita.