Fraccion di AVP a bolbe dirigi un serie di pregunta na Prome Minister Evelyne Wever Croes riba varios topico y na mes momento a dirigi otro cartanan pa solicita varios reunion publico cu ministernan relaciona cu temanan di vital importancia/
Lider di fraccion di AVP, sr Marlon Sneek a mustra cu ta otro serie di carta cu fraccion di AVP ta dirigi na tanto Presidente di Parlamento como Gobierno, ya cu ta mesun gobierno aki a papia di un maneho transparente na inicio di su periodo pero simplemente nunca a cumpli cu e promesa aki.
“Nos fraccion a pidi Prome Minister pa copia di e carta cu Gobierno Hulandes a manda pa Gabinete Wever Croes relaciona cu medidanan adicional cu nan kier mira ehecuta segun protocol firma na luna di november di 2018 pero Premier a informa cu tal carta no ta existi.
Sinembargo siman pasa ata Minister di Enseñansa den su afan pa hustifica su decision di suspende tur pago di overtime na maestronan, ta bira confirma cu e carta aki ta existi y cu a cuminsa ehecuta esaki tambe.
Segun Minister Lampe, gobierno tin hopi presion di Hulanda pa reduci presupuestonan, reduci gastonan y ta algo cu tin cu wordo ehecuta ya cu su gobierno a sigura Hulanda cu esaki lo pasa.
Pues di un banda Prome Minister no kier duna Parlamento e carta aki pa mira pero di otro banda Minister Rudy Lampe ta confirma cu e carta aki ta existi y nos fraccion a dirigi un carta un biaha mas na tanto Prome Minister como Presidente di Parlamento, pa nos haya copia di e carta aki pa haya sa contenido di esaki y con serio e situacion ta.
Notabel di henter e proceso y desaroyo aki ta cu mientras cu Minister di Enseñansa ta reduciendo gasto den educacion di nos mucha y hobennan, ta Sali un publicacion di IMF cu ta bisa net lo contrario, señalando cu Gabinete Wever Croes a confirma na e institucion aki un vision totalmente diferente.
Den e rapport di IMF ta wordo mustra cu Gabinete Wever Croes a sigura IMF lo siguiente pa loke ta e sistema di educacion, esta cu “the administration efforts to develop a knowledge economy–such as higher education–could boost growth over the medium to long term” mientras cu e maneho di e gobierno ta net lo contrario, caminda ta buscando na reduce gasto riba lomba di enseñansa sin haci esfuerso na reduce gastonan riba biahamento pa loke y empleando mas y mas hende den servicio di gobierno.
Un biaha mas ta Sali na cla cu Gabinete Wever Croes ta sigui insisti na haci mofa di tur hende, hasta di institucionnan internacional manera IMF sigurando cu enseñansa ta importante pa progreso di e pais pero ta haciendo net lo contrario.
Nos kier un copia di e carta cu Hulanda a manda pa gobierno pa asina analisa e situacion cu tin na e momentonan aki,” lider di fraccion Marlon Sneek a declara.