No tin respet mas pa nos defuntonan nan ultimo lugar di sosiego.
Keto bay e supuesto bruhonan ta sigui tira nan supuesto bruherianan den santana di Paradera y tin algun habitante di Paradera ta cansa caba, cu cada biaha cu nan bay bishita graf di nan defunto stima nan ta topa cu cosnan fies y holor hopi desagradabel den cura di Santana.
Paradera: Diamars den oranan di mainta, un biaha mas un habitante di Paradera a bay bishita graf di un defunto stima y a bolbe topa cu un saco di sushi, cu un caha di sapato, cu apartemente bestia morto den dje y mas cos straño den e saco hinka. E saco tabata saca un holor hopi desagradabel. Tambe ela topa cu un botter kibra, obheto straño lora den un pida paña preto y tambe sushi parecido na sushi humano, gespaart rond y dilanti di algun graf.
Esaki no ta prome biaha ta constantemente ta haya cosnan benta den santana, semper ta e mesun camindanan, e parti pazuid den santana, band’i pariba y mucho menos band’i panort no sa haya cosnan ey tira. No ta conoci si nan ta djes pasa tire den e cura di Santana of si ta bula e cura y bay pone nan eyden.
Esaki ta keda pasa constantemente, cu den Santana di Paradera ta haya cosnan fies/bruheria benta. Varios biaha polis mester a bay den santana pa motibo cu un bishitante a bay na graf di nan sernan keri y a topa cu cosnan hopi desagradabel (bruheria), bestia morto, bala di carni, sanger di bestia basha riba grafnan etc. Polis durante patruya semper ta tira bista den e area aki, pero te ainda suerte no a tocanan di topa cu e supuesto bruhonan bentando nan bruherianan den Santana.
E caminda pazuid di Santana ta hopi keto y scur, esaki ta haci’e hopi mas facil pa e hendenan cu ta kere den e cosnan ey, haci nan fechorianan.
Algo mester wordo haci, Santana di Paradera ta un santana grandi y bon manteni, e bishitante cu a topa cu e supuesto bruherianan, a bisa “cu e ta spera cu pronto pone iluminacion fuerte bandi pazuid di e Santana, pa asina mira cu si nan lo stop di benta bruheria den Santana. Esaki ta un falta di respet pa e defuntonan”.