Oranjestad – Minister Ruiz-Maduro a tuma nota di e informacionnan den medionan di Prensa y riba medionan social den cual ta menciona cu Gobierno ta malinforma pueblo tocante e Ley di BBO. Riba esaki e mandatario ta splica lo siguiente:
Introduccion di Ley di BBO
Articulo 3 di e Ley di BBO ta menciona cu ‘De belasting wordt berekend over de bedrijfsomzet die de ondernemer in het kader van zijn onderneming heeft gerealiseerd door het leveren van goederen en het verrichten van diensten in Aruba.’
Na aña 2007 ora e Gobierno cu tabata na mando e tempo ey a introduci e Ley di BBO, Gobierno a haci un excepcion di permiti pa pone e impuesto ariba e factura. Na ningun momento tabata e intencion pa cambia e origen di e impuesto. Ademas riba tur material di informacion y ‘toelichting’ di aangifte di BBO ta menciona cu e impuestonan aki ta ‘De belasting op bedrijfsomzetten (BBO) en de bestemmings BAZV/BAVP worden geheven over uw omzet.’ Esey ta nifica cu BBO, BAZV y BAVP ta impuestonan ariba benta y servicio di comercio.
BBO no ta un Salestax
BBO no ta un impuesto indirecto pa e consumidor manera un salestax, IVA, etc. Esey ta nifica cu BBO ta un gasto di comercio. Consecuentemente e pago di e impuesto aki ta ser deduci como gasto di comercio mescos cu otro gastonan di comercio.
Implementacion di BBO
Na momento cu a introduci e Ley di BBO tabatin parti di e comercio cu a scohe pa absorba e porcentahe di 6% debi cu nan por a deduci esaki como gasto. Otro parti di comercio a scohe pa pasa e impuesto pa e consumidor, sea cu e comerciantenan a menciona e cobransa aki riba nan factura of a adapta e prijsnan internamente. E hecho cu na momento comercio dicidi di pasa e cobransa di e impuesto pa e consumidor no ta kita e derecho di comercio pa pone e suma aki como gasto pa haci negoshi.
Motibo cu a cambia e Ley di BBO
Aña pasa na momento di introduccion di e ’crisisheffing’ cu BBO, BAZV y BAVP a bira 6% , Gobierno a tuma nota cu tabatin comerciante cu tabata cobra mas cu 6% manera ta prescribi den e Ley di BBO, esta tabata cobra e consumidor 6.38%. Gobierno na su turno dentro di e Leynan no tin un forma pa contra-aresta esaki. Den e caso aki Gobierno a constata cu comercio a scohe pa transforma e impuesto aki den impuesto pa e consumidor, locual no ta e origen di e impuesto aki manera prescribi den e Ley di BBO.
Un comparacion di prijs mas husto
Pa e motibo aki Gobierno a scohe pa elimina e hecho di pone e impuesto aki riba factura en bes di scohe pa elimina e posibilidad pa deduci e pago aki como un gasto di comercio, e mandatario a subraya. Asina e consumidor lo por yega na comparacion di prijsnan entre comercio den un forma mas husto y transparente. Alabes e Ley di BBO lo ser implementa den su forma corecto, esta riba impuesto di benta y servicio y manteniendo e posibilidad cu comercio por deduci e impuesto aki como gasto.