ORANJESTAD-(AAN): Durante e temporada di vacacion escolar, Kiwanis Club of Aruba a planea pa haci su di dos “Hands-On Project” pa e aña Kiwanistico 2018 – 2019. E biaha aki a toca turno pa duna un facelift na Anglo Kleuterschool.
E presidente di Kiwanis Club of Aruba, Edalitza Weller y e miembronan di e “Hands-On Committee” a reuni cu e cabesante di Anglo kleuterschool, Juffrouw Marieta Croes-Geerman, pa haci un inspeccion na e scol. Prome cu a cuminsa cu e verfmento di e entrada di e scol, “gymzaal”, “zandbak” y “play ground”, mester a laga drecha tur e scheurnan riba e murayanan y e materialnan di e “playground”. Despues cu esaki a keda cla a continua cu e verfmento, cu a tuma lugar diasabra 27 di juli cuminsando for di 6’or di mainta.
Un total di 65 boluntario cu ta pertenece na entre otro: Kiwanis Club of Aruba, SLP Clubs como tambe famia di e miembronan y e maestronan di Anglo Kleuterschool, a duna un man pa asina logra realisa ademas di e verfmento, drecha tambe algun otro area di e scol. Cual ta un total di 465 ora di servicio comunitario cu a wordo dedica na e proyecto aki. Kiwanis Club of Aruba ta gradici e cooperacion ricibi di WEMA cu ademas di a haci donacion di e verf, nan a asisti tambe cu un team di 7 persona pa yuda. Flora Market cu a haci donacion di mata y tera pa algun “bloembak”. E colaboracion ribici di AIS cu a yuda cu un ‘scissor lift’ y na Nagico pa haci e transportacion. Na e artista di airbrush, Shatty, cu a keda encarga pa haci e arte na muraya di e nomber y logo di Anglo Kleuterschool . Cu e realisacion di e proyecto aki di Kiwanis Club of Aruba na Anglo Kleuterschool na Madiki, un total di 168 mucha lo ta contento cu un scol bunita geverf pa e aña escolar nobo.