Recientemente Minister di Transporte, Comunicacion y Sector Primario, sr. Chris Romero, a reuni cu CEO di Wealth Trend Trading, Dr. Abdul Manaff. Dr. Manaff a keda compaña pa su representantenan na Aruba, sr. Dodia, sr. Williams y sr. van Spaandonk.
Minister Romero a duna dr. Manaff un splicacion amplio di su responsabilidadnan como Minister na Aruba y como tal e funcionamento di e carteranan cu e tin na su encargo.
Tambe a menciona na e grupo su interes pa desaroyo di San Nicolas y vecindario, como tambe e importancia di transporte aereo y maritimo pa nos pais. A mustra dr. Manaff e enfasis cu Minister Romero ta poniendo riba nos Sector Primario y diferente proyectonan cu tin actualmente.
Di su banda dr. Manaff a duna un briefing di su compania y haci su mes disponibel na colabora cu Minister Romero su vision pa e desaroyo di Aruba, particularmente den e areanan cu ta regarda e carteranan di Transporte, Comunicacion y Sector Primario.
Dr. Manaff ta un experto y doctor den e areanan financiero, di mercadeo, pero tambe e ta un medico. Su pasion ta, entre otro, aviacion y tin varios aña di experiencia den e mundo di aviacion. Dr. Manaff a inicia diferente aereolinea den su trayectorio profesional y tambe ta dispone di un experticio respetabel den e mundo financiero.
Mester remarca cu e reunion entre Minister Romero y dr. Manaff tabata uno hopi fructifero. A keda palabra cu e titular di e cartera di Transporte lo traha di serca cu e compania di sr. Manaff, pa asina sondea e posibilidad pa financiamento di diferente proyecto cu ta desaroyando den e Ministerio di sr. Chris Romero.