Prome Minister Evelyn Wever-Croes ta sumamente satisfecho pa por informa comunidad di Aruba cu e proyecto di airco y digitalisacion pa e scol Cacique Macuarima ta birando un realidad. Gobierno di Aruba conhuntamente cu FUTURA a scoge e scol aki como un scol piloto pa introduci digitalisacion. Como parti di e proyecto aki e scol menciona lo ricibi borchinan digital pa por duna les, mas disponibilidad di laptop y computer, y ekiponan sofistica di virtual reality (VR) cu lo facilita e muchanan den nan siñamento. Pa haci esaki possible, e klasnan mester haña nan airco tambe.
Scol Cacique Macuarima a wordo scogi riba peticion di comision di mayornan despues cu nan mes a inverti substancialmente den e proyecto aki. Gobierno di Aruba conhuntamente cu FUTURA a partner up cu comision di mayor pa asina e proyecto di digitalisacion y airco bira un realidad.
Segun Premier Evelyn Wever-Croes, inversionnan ta tumando luga caba. E airconan lo wordo instala den e dianan venidero y e digitalisacion lo ta cla pa e aña escolar nobo. Gabinete Wever-Croes a cuminsa cu e proyecto piloto aki pa por incentiva nos muchanan pa haci mas tanto uzo posibel di e facilidadnan cu tin pa yuda nan den nan estudio. Gobierno di Aruba su vision ta dirigi riba innovacion y esaki ta un ehempel di innovacion den enseñansa.
Prome Minister di Aruba Sra Evelyn Wever-Croes ta gradici Parlamentario Edgard Vrolijk kende ta e motor tras di e proyecto aki ya cu Señor Vrolijk ta e persona cu a presenta e proyecto aki na prome luga y a insisti pa haci esaki un realidad. Tambe gradecimento ta bay na e team di FUTURA cu ta un ekipo di hobennan dinamico cu a kere den e proyecto aki y ta yudando pa haci esaki posibel. Tambe un danki ta bay na colega Minister di Enseñansa Rudy Lampe y SKOA cu ta coopera cu e proyecto. Finalmente ta gradici comision di mayornan y cuerpo di docente di Cacique Macuarima kendenan tambe a contribui pa haci e proyecto aki un realidad.
Premier Wever-Croes; “Cu poder di Dios ora aña escolar nobo habri, Aruba lo tin su prome scol piloto completamente digitalisa na Santa Cruz”.