Recientemente Minister encarga cu Infrastructura Otmar Oduber a reuni cu team di DOW pa trata e planificacion di camindanan cu lo bay drecha/asfalta durante 2019 y 2020. E maneho di Gobierno ta enfoca riba mehoracion di calidad di bida di ciudadanonan y como parti di esaki a scoge pa hiba un maneho di infrastructura cu ta enfoca den barionan. Di e forma aki ta sigura cu ta actualisa y cumpli pa mehora e camindanan di santo cu tin rond Aruba, cual ta un preocupacion pa entre otro salud di e ser humano
E proximo camindanan cu ta prioridad a wordo poni riba mesa den e reunion cu e team di DOW, pa cual Minister Oduber a splica cu ta hopi trabou tin pa tuma luga. DOW a bay ta haci un gran esfuerso pa logra cumpli cu mas caminda cu ta posibel y por a mira cu hopi caminda a wordo traha di nobo di asfalt.
DOW tin criteria cu ta haci uzo di dje na momento cu ta scoge pa asfalta y drecha camindanan manera: e uzo di e caminda, cuanto hende ta biba den e area, cuanto biaha DOW mes ta haci mantencion na e caminda aki y camindanan di mas bieu. E maneho pa loke ta e fondo di drecha caminda ta: Cu e budget cu ta haci uzo di dje pa 70% ta dedica na mehora calidad di bida di e ser humano por medio di pone asfalt na camindanan di tera. E resto di e presupuesto cual ta 30%, ta bay na drecha camindanan cu ya caba ta di asfalt pero cu ta bieu y den mal estado. E trabounan aki a base di e planificacion nobo ta inicia aworaki na juli.
Durante e ultimo aña por a bira gran cantidad di bario cu a ricibi asfalt, pa cual ta importante pa para keto y realisa cu asfalt no ta un luho! si nos bay mira e daño cu e stof ta haci na salud di hende y forma di biba (cera) den cas, pero tambe e daño material na auto ora e caminda ta malo entre otro. E impacto na momento cu asfalta un bario ta enorme pa famianan y ta eleva e calidad di bida di henter e area. Muchanan tambe eorey por hunga mas mihor pafo, core bais etc., Minister Oduber a splica.
Banda di e camindanan di asfalt, tambe DOW ta ricibi hopi peticion pa verkeerspleau den barionan. Actualmente tin entre 300 cu 400 peticion tur rond Aruba, sinembargo a tuma e decision y ta traha den cuadro di esaki tambe cu lista di prioridad y un prioridad sigur ta brinda proteccion na nos muchanan. Pues aworaki ta percura pa tur caminda cu tin scol y cu a haci peticion, cu eynan tin un verkeersplateu pa reduci velocidad di automobilistanan. Adicionalmente mas borchi ta bay wordo implementa pa limita velocidad di auto den cercania di scolnan. Tin cierto sitio cu ya caba DOW a implementa e borchinan aki, pero e intencion segun Minister Oduber ta, pa pone e borchinan aki cu ta indica pa baha velocidad den e area durante cierto orario, na mas caminda. Di e forma aki comunidad ta hay un bista e forma con ta hiba e maneho pa locual ta mehoracion di camindanan rond Aruba enfocando prome riba e ser humano.