Parlamentario Endy Croes durante conferencia di prensa dialuna mainta a haci algun pregunta publico na Ministerio Publico alrespecto presunto corupcion den tereno di pueblo durante 8 aña di gobierno di AVP. Kico tabata pasa exactamente? Di acuerdo cu Parlamentario Croes nan a haci un investigacion preliminar unda masha hopi documento a bin dilanti y hunto cu masha hopi prueba a haci un denuncia oficial na Ministerio Publico pa cu e “Tereno Gate” cual lo bay den historia momento cu esaki bin dilanti basa riba e enbergadura di e caso.
Dealnan corupto di tereno
Con e presunto fraude y corupcion tabata tuma lugar? Desde oficina di Benny su chief of staff entre otro ta manda informacion pa Leoncita cu na Barcadera por ehempel tin algun lote di tereno habri unda cada un ta alrededor di 5000 M2 y e mes ta manda bis’e cual ta esun mas mihor. Aparentemente Leoncita ta traha deal y tin prueba di email unda un comerciante ta manda bisa Leoncita cu e promer 100 mil florin ta cla asina cu esaki wordo firma. Benny ta firma pa un NV haya opties riba cierto tereno. Otorgamento di optie pa terenonan comercial ta regla den Landsverordering AB 1989 GT 21. Periodo pa opties ta 6 luna y bou condicionnan estricto por haya prolongacion sino esaki ta caduca “van rechtswege” y no lo duna e erfpacht como tal. Wel Benny y su gang a fiesta rond di tur esaki sin respeta ley. Nan tabata duna permiso pa bende shares di NV’s unda automaticamente e optie riba e tereno comercial tabata bay pa esnan cu cumpra e NV, esta e shares y asina strica miyones cu patrimonio di Aruba.
Hortamento di tereno di pueblo
Nos lo recorda pueblo di algun y mayoria ta gelink na Leoncita. Deshaun NV un tereno di 5540 M2, unda e NV aki ta 100% di Leoncita y a wordo lanta casi 2 luna despues cu el a haya e tereno. Papiando di corupcion? Elenath Development a ricibi un tereno 5261 M2, Charm Rock Development 40.096 M2, Mantbraca NV 24.000 M2, Damira Real Estate di Gaby Werleman y asina tin un lista di terenonan cu a wordo bendi na e manera aki cu cooperacion di Benny Sevinger y e clan di AVP.
Parlamentario Endy Croes ta haci un yamada na Ministerio Publico pa duna pueblo informacion alrespecto di e investigacion como cu pueblo ta puntrando y tin derecho di sa den cual fase esaki ta andando. No por ta asina cu un grupo ta probecha di nos sistema, haci nan mes miyonario cu patrimonio di pueblo y e pueblo mes ta keda sufri sin tin claridad. Prohibi pa pueblo lubida e palabranan di Benny den parlamento: “I don’t give a damn!”. AVP nunca pero nunca mas!