ORANJESTAD – Despues di un luna deportivo, yena cu emocion y alegria, por bisa cu sumo placer cu Olimpiada Escolar a clausura cu broche di oro. Un olimpiada cu a haya su representacion simbolicamente di Aruba su naturalesa, a carga e nomber di ‘Un homenahe na nos Tera y nos Naturalesa’.
E evento di olimpiada escolar a wordo descontinua algun aña atras y e efecto negativo cu esaki a trece cu ne tabata notabel. Pa es motibo, Minister Dangui oduber a duna di conoce cu bou di e maneho nobo di deporte, a percura pa trece esaki bek, pa por stimulando deporte cerca nos hobennan. Na banda di esey a uza e evento aki pa por duna un conscientisacion na nos hobennan riba e parti di ecologia, como tambe a tuma e oportunidad pa duna reconocemento na Rufo Kelly, un persona cu a aporta grandemente na deporte escolar.
Durante e clausura bunita di Olimpiada Escolar Betico Croes 2019, Minister Dangui Oduber a expresa su gratitud na cada un cu a forma parti di e organisacion, como tambe na cada participante. “Deporte ta algo indispensabel den nos comunidad, principalmente pa nos hobennan. E ta un orguyo pa mira e esfuerso haci door di cada docente, mayor y mas cu claro tur studiante cu a participa den e olimpiada. No solamente boso ta representa boso scol, sino cu boso ta representa un futuro briyante pa Aruba”, e mandatario a expresa. Minister Dangui Oduber a yama danki na e 42 scolnan cu a participa den e 14 diferente disciplinanan deportivo. Despues di a paga e candela di olimpiada, a keda anuncia cu lo sende esaki bek dia 15 di mei 2020. Otro anja minister Oduber a sigura cu lo ta aun mas grandi cu e anja aki pa di e forma aki stimula participacion activo di nos muchanan den deporte.
E premiacionnan di Olimpiada Escolar Betico Croes 2019 ta como lo siguiente:
Overall Winners:
Scol Preparatorio – Colegio Conrado Coronel
Scol Basico – Colegio Sagrado Curason
Scol Avansa – Colegio Arubano
2nd Place Overall:
Scol Preparatorio – Jacinta Kleuterschool
Scol Basico – Scol Basico Washington
Scol Avansa – Maria College
3RD Place Overall:
Scol Preparatorio – Scol Preparatorio Cacique Aterima
Scol Basico – Mon Plaisir Basisschool
Scol Avansa – La Salle College
MVP Scol Preparatorio – Aldrion Maduro di Colegio Conrado Coronel
MVP Scol Basico – Vince Ramada di S.P. Kudawecha
MVP Scol Avansa – Braeden van Spaandonk di Colegio San Nicolas
Docente Mas Activo – Rene Kannegieter di S.P. Kudawecha