ORANJESTAD, Aruba – Pa prome biaha AZV a organisa e Health Fair y Dr. Horacio E. Oduber Hospitaal no a duda ningun momento pa participa. Tabata un momento pa sali for di e edificio di hospital y topa e publico den un otro atmosfera. Nan a acerca y haci preguntanan tocante orarionan di bishita, tocante kico nan tin cu haci prome cu opera, kico nan ta haci ora ta den hospital y hopi mas. Publico a sigui puntra kico ta e reglanan nobo, ora interna pashent, cuanto dia prome ta yama e persona, etc.
Charlaine Alexander-Huntington, Gerente di e departamento di comunicacion y informacion di Hospital, a duna di conoce cu a duna informacion tocante e policlinicanan, unda por haya nan, e locacion di clinicanan, hopi hende no sa unda e specialistanan ta.
Un di e departamentonan di hospital cu tin un fluho grandi diario ta cuido ambulante, e asina yama “dag opname”. Nan tambe tabata presente pa duna informacion na esunnan cu ta bay haci un operacion chikito, pues cu no mester keda interna den hospital pa mas cu 4-5 ora.
Hospital a gradici LabHOH pa nan participacion y pa a comparti hopi informacion tocante sacamento di sanger, nan orario y hopi mas. Tambe Bloedbank tabata t’ey pa haya mas donante, p’asina Aruba por tin mas sanger ora mester di mas sanger.
Tambe ta hopi importante ora cu ta sali pafo asina y ta spera pa papia cu hende pa sa kico nan ta pensa. A tene un encuesta cu diferente tipo di pregunta pa hospital tambe sa kico publico ta pensa di nan, di e website, tocante e servicio y asina por conoce nan pashentnan mas di cerca. Tambe pa mira kico mester traha riba dje pa mehora servicio, pasobra na final esey ta e meta di Hospital.