Recientemente, Conseho di Minister a aproba e institucion Begrotingskamer.
Begrotingskamer lo ta e organo Arubiano cu lo ta encarga cu e supervision financiero di nos pais unabes CAFT bay. Miembronan den e Begrotingskamer lo wordo apunta solamente pa Aruba. Hulanda lo no por apunta niun miembro nobo den e Begrotingskamer. Cu esaki, segun Premier Evelyn Wever-Croes, Aruba lo haya su autonomia financiero bek.
“Palabracionnan cu Hulanda ta cu unabes CAFT bay, e Begrotingskamer lo keda completamente encarga cu e supervision financiero di Aruba. Esaki lo pasa na aña 2021. Gobierno ya ta trahando riba tramitenan pa Begrotingskamer bira un realidad mas pronto posibel. Segun e proposicion cu a wordo aproba pa Conseho di Minister, e Begrotingskamer por bira realidad for di awo pa un aña caba”, Premier Wever-Croes a duna di conoce.