Parlamentario Endy Croes a baha fuertemente riba Mike Eman y Mike de Meza durante conferencia di prensa. Parlamentario Croes a splica cu e ta hopi indigna momento di a mira Mike de Meza den Parlamento diahuebs ultimo na momento di trata e Ley di LAFT anto Mike de Meza – esun cu a causa e desaster financiero – no tabatin ni e decencia pa pone su nomber pa e debate. A sinta come cuminda di Parlamento henter dia y na final di anochi a vota contra e Ley di LAFT y corigi esaki di acuerdo cu recomendacionnan di Raad van Advies.
Destruccion di finansa publico
Mike Eman ta un otro persona cu no ta gana respet di comunidad como cu netamente Mike Eman tabata na timon y ta bao di su nanishi y consenshi a laga Mike de Meza destrui nos finansas publico. Hunto e combo aki a crea e Mega Debe. Na 2014 Hulanda a cay aden y a pone un KB riba Mike unda Mike manera un mal mucha a bay sinta bao di palo bebe Ensure mandando gritonan di desperacion pa gobernador pa “firma awor”. Mike Eman y AVP no por tin e pueblo aki nunca na pecho. Momento bo lesa rapportnan di entre otro Banco Central y cifranan di finansas bo ta haya “berre berre” pa locual a tuma lugar. Den tur esaki Mike Eman y Mike de Meza ainda den aña 2018 kier manipula cu informacion y na varios ocasion a trata na splica pueblo cu mas engaño, por ehempel cu nan vision “berde” tabata crea debe bao capa di inversion endeudando e pais y cu esaki lo engrandece nos economia.
Teoria di Paul Krugman
Rapport di Banco Central a mustra net lo contrario cu den aña 2015 tabata tin un crecemento economico negativo, esta -0.4 % y na 2016 tambe un crecemento negativo di -0.1%. Pa conclui Raymond Gradus di CAFT a declara na prensa na juni 2018 lo siguiente: “Aanjagen van Economische groei door schuld op te bouwen werkt niet voor een kleinschalig economie en dit is nu bewezen”. Pues tur e teoria di Paul Krugman, amigo di Mike Eman y Mike de Meza, no a resulta y CAFT cu prueba a bari esaki for di mesa. Tristo si cu Aruba y conciudadanonan mester bay paga e debe e proximo 20 añanan pa e aventuranan y manipulacion di Mike Eman y AVP.
Parlamentario Croes a termina bisando cu nos a hereda un Aruba completamente manera un ruina na rand di bati bancarota pero a lora manga di camisa y a cuminsa traha. Apenas den un aña y mey di gobernacion ta logrando pasonan gigantesco di progreso aunke kisas algun decision por a causa poco iritacion den pueblo. Nos a dal un stap atras pa frena e dolor y pone ordo y pronto lo sa di bay cu pasonan grandi dilanti, Parlamentario Croes a termina bisando.