Home Politics Cu telefon 5881010: ...

Cu telefon 5881010:

Bureau Sostenemi ta legalmente ancra como ‘Meldpunt’ nacional

SHARE

Gabinete Wever Croes recientemente a tuma e decision di haci Bureau Sostenemi e meldpunt nacional pa tur caso cu tin di haber cu abuso y negligencia di mucha.

Aña pasa, na caminda pa esaki, Gobierno di Aruba a percura pa haci tur yamada pa e number di Bureau Sostenemi cu ta 5881010, completamente gratis. Inmediatamente nos a ricibi e cooperacion di SETAR. Mientras tanto nos por anuncia cu hasta for di DIGICEL, un yamada pa 5881010, cu ta un yamada cu por rescata un mucha for di abismo di tortura, lo ta gratis pendiente ehecucion di algun detaye.

E logro grandi aki ta otro prueba palpable cu pa Gabinete Wever Croes y Minister Glenbert Croes, siguridad di nos criaturanan tin prioridad, bienestar di nos muchanan ta na prome luga. Y e prome paso ta di a haci 5881010 di Bureau Sostenemi nos meldpunt nacional. Esaki ta e prome paso den e bon direccion pasobra ta cuminsa cu meldpunt. Proximamente ta bay introduci e protocol y metodo con cada instancia y departamento concerni mester atende cu cualkier reporte of constancia cu tin abuso y/of negligencia tumando luga.

Gobierno di su banda ta fortificando, apoyando, subsidiando e instancianan den e sector Social pa hunto logra cambionan fundamental pa sigura cu niun mucha ta keda atras. E ta un lucha atroz. Pasobra un palo cu crece krom, ta tuma hopi esfuerso, perseverancia y persistencia, compaña cu fe, pa por logra enderesa esaki. Imposibel e no ta pero e ta tuma un empeño constante di tur envolvi. Pa ultimo decada e sector social a bin ta empeña riba propio forsa. Awor tin un Gobierno cu ta apoya y fortifica nan pa hunto nos logra e miho pa nos Pais.

E yamada awor ta na nos Pueblo. Corectamente manera Minister Glenbert Croes a expresa: “Na henter nos comunidad, laga nos cera cabez cu otro,  laga nos para schouder cu schouder cu otro, laga nos haci e compromiso cu nos ta bay garantisa, sigura cu nos yiunan y nos famianan lo tin un miho futuro sin violencia, sin maltrato, sin abuso, pasobra e cuido di nos criaturanan ta responsabilidad di nos tur. Bo wak algo #nobiracara. Si bo sa algo #kibrasilencio. Si bo tin cualkier inquietud yama #5881010.” Bo yamada por scapa un bida y e no ta costa bo nada.