55
ORANJESTAD – Dialuna Minister Ruiz-Maduro a ricibi e promer placa di papel di e serie nobo di florin 2019 for di Presidente di Banco Central di Aruba sra. Jane Semereel den presencia di e ehecutivonan di Banco Central sra. Miriam Gonzalez y sra. Penelope Tromp-Gomez.
Despues di 7 aña di hopi trabou, Banco Central di Aruba ta presenta e serie nobo di placa di papel di florin cu diseñonan nobo y elementonan di seguridad mas moderno. E placa di papel cu ta actualmente den circulacion ta di aña 2003 y a bira tempo pa reemplasa esakinan pa asina por sigura cu nos placa di papel ta keda di calidad halto y ta conta cu elementonan mas avansa di seguridad.
E placa di papel di e serie di 2019 ta conta cu denominacion di 10, 25, 50, 100 y 200 florin. E denominacion di 500 cu tabata forma parti ainda di e serie di 2003, awor a wordo cambia pa 200 florin pa e uso mas practico di e denominacion mas grandi di nos placa di papel.
E serie nobo ta hiba e tema ‘Bida na Aruba’ y cada uno tin diseñonan produci door di e artista local Nigel Mathew. E diseñonan ta contene aspectonan di nos flora, fauna, herencia cultural, monumentonan y lugarnan prominente na Aruba. Ademas e placa di papel ta contene e elementonan mas avansa di seguridad manera, entre otro, marca di awa, strepi metalico 3D cu movecion, simbolo cu cambio di color y micro letter. Pa acesibilidad a usa inkt tactico pa persona cu deficiencia visual.
Desde diamars 4 di juni 2019 e placa di papel di florin nobo lo ta den circulacion. Durante e periodo di 3 di juni 2019 pa 11 di augustus 2019 lo tin co-circulacion di e serie nobo di placa di papel 2019 hunto cu e serie di placa di papel di florin 2003. Dia 12 di augustus 2019 lo saca e serie di placa di papel di 2003 for di circulacion. Entre 4 di juni 2019 y 4 di december 2019 por cambia e serie di placa di papel di 2003 solamente na banconan comercial. For di 5 december 2019 te cu 12 di augustus 2049 por cambia e serie di placa di papel di 2003 pa placa di papel di 2019 solamente na Banco Central di Aruba.
Minister Ruiz-Maduro ta enfatisa pa ban aprecia nos placa di papel nobo cu nan bunita diseñonan produci pa nos artista local. ‘Nos ta sumamente orguyoso di nos placa di papel nobo y cu confiansa nos por bisa cu e placa di papel 2019 di nos dushi Pais Aruba lo bolbe gana premio rond mundo pa nan bunitesa’ e mandatario a termina bisando.