Minister encarga cu Desaroyo Teritorial, Infrastructura y Medio Ambiente Otmar Oduber a informa di e proceso y resultado di screening cu a tuma luga riba desaroyadornan interesa den construccion di hotel na San Nicolas. Despues cu e proyecto di desaroyo hotelero na San Nicolas a yega na e punto cu tin un contract (overeenkomst) cu e desaroyador esta Three Rivers, cierto momento (manera cu ta conoci), tabatin cartanan cu keda publica den medionan di prensa cu tabata dirigi entre Banco Central y banconan comercial na Aruba. E carta tabata basa riba publicacionnan haci den e corant Bon Dia Aruba caminda cu tabata atacha nomber di esnan tras di e proyecto.
Proceso
Despues di e fase di ‘overeenkomst’ lo a avansa pa notaris y por ultimo e desaroyadornan lo mester cumpli cu e ‘performance bond’ cu ta un suma di mas o menos 5.5 miyon dollar pa cual mester di un licencia di banco pa por introduci esaki. Consecuentemente Banco Central na su turno a manda un carta pa Gobierno cu sugerencia pa un investigacion mas profundo wordo haci. Mester menciona cu Gobierno riba su mes a haci diferente investigacion, y a tuma e decision conhunto pa haci peticion na Veiligheidsdienst Aruba (VDA) pa haci un investigacion mas profundo di e personanan y compania participante, Minister Oduber a splica.
Resultado di screening
Resultado di e screening aki a drenta diabierna 2 siman pasa. Pa cual diabierna siman pasa prome Minister sra. Evelyn Wever – Croes a dirigi un carta na Banco Central mustrando riba e hecho cu e screening no a trece nada negativo pa e grupo envolvi. Gobierno ta considera e informacion aki sumamente positivo y alabes ta mustra cu ta atende cu esaki den forma serio.
Proximo paso
Awor conhuntamente cu e screening aki ta hacie posibel cu Gobierno por haci e evaluacion pa extende e contract cu e compania considerando cu fin di siman cu a pasa e contracto aki a vence pa motibonan externo. Pa cual Gobierno mester tuma e decision e siman aki pa extende e contracto aki a base di e informacion nobo cu a ricibi di VDA cu ta mustra e resultado positivo di e screening.